«Түркістан дауысы» байқауы басталды

Түркістан облыстық мәдениет басқармасының ұйымдастыруымен республикалық «Түркістан дауысы» әншілер байқауы өтуде. «Конгресс Холл» көпсалалы кешенінің сахнасында 17 қатысушы 2 күн бойы өнер көрсетеді. Бұл туралы басқарма басшысы Әзімхан Қойлыбаев брифингте мәлімдеді.
Байқау ережесі бойынша барлық қатысушылар алдымен Қазақстан композиторларының әндерін және өз таңдауы бойынша кез-келген әнді орындауы шарт. Гран-при жүлдесі 2 млн теңге. Сондай-ақ, лауреаттар мен барлық қатысушыларға арнайы бағалы сыйлықтар табысталады.
«Түркістанда биыл екінші рет ұйымдастырылып отырған ән додасында еліміздің 17 облысынан келген жас дарын иелері бақ сынайды. Бұған дейін 18-35 жас аралығындағы 52 үміткер өнер сайысының іріктеу кезеңіне онлайн форматта өтінім білдіріп, оның 17-сі ақтық кезеңге жолдама алды. Байқау мақсаты — шығармашыл, дарынды жастарды анықтау, оларға қолдау көрсету, халықаралық мәдени, туристік байланысты дамыту және нығайту, қазақ музыкасын әлемдік деңгейде насихаттау», — деді облыстық мәдениет және халық шығармашылығы орталығының директоры Мейіржан Алиакбаров.
Баспасөз мәслихатына арнайы қатысқан қазылар алқасының төрағасы, танымал әнші-композитор Медеу Арынбаев Түркістан төрінде ән шырқаудың өзі мәртебе екендігін атап өтті. «Құрмет» орденінің иегері, композитор Бейбіт Оралұлы да байқаудың әділ өтетіндігін алға тартып, барлық үміткерлерге сәттілік тіледі.