Түркістанда «Армандар орындалады» акциясы жалғасуда

Түркістан қаласында Балалар жылына орай түрлі мерекелік бағдарламалармен қатар «Армандар орындалады» акциясы да жүргізілуде. Аталған акция маусым айында алғаш рет өткен болатын. Акцияның мақсаты — мүмкіндігі шексіз, үйде оқытылатын балалардың қоғамнан тыс қалмауын қамтамасыз ету. Ұйымдастырушы, түркістандық ұстаз Әсел Бимырзаеваның айтуынша, тізімге алынған 10 бүлдіршіннің «Менің арманым…» деп басталатын хаттары жинақталады. Хаттар балалардың арманын орындауға ниет білдірген азаматтарға жеребе арқылы жеткізіледі. Бұл айда бүлдіршіндерге қуаныш сыйлайтын шараға ҚР Парламент мәжілісінің депутаты Мақпал Мыса, айтыскер ақын Бекарыс Шойбеков, Сауран ауданынының әкімі Ғани Рысбеков секілді азаматтар атсалысты. Елорда күні қарсаңында акцияның тағы бір легі тәмамдалып, балаларға арнап концерттік іс-шара ұйымдастырылып, түрлі сыйлықтар табысталды. Қоғамдық даму басқармасының басшысы Аңсар Өсербаевтың балаларға деген ізгі ниеті жазылған алғыс хаты табысталып, аниматорлар балаларға түрлі ойын ойнатты. Сондай-ақ і-шараға Түркістан қалалық адами әлеуетті дамыту бөлімінің басшысы Оразкүл Шайқықызы, Түркістан қалалық депутаты Жәмила Сулейменова, Аманат партиясы Сауран аудандық филиалының атқарушы хатшысы Сағынбек Жақсыбекұлы қатысып, ізгі тілектерін білдірді.