Мұқтаж жандарға көмектесуді, сондай-ақ демеушілік көмек көрсетуді қалайтын кез келген тұрғын Түркістан облысы адами әлеуетті дамыту басқармасының байланыс орталығындағы +7(707)-684-71-00 телефон номеріне хабарласа алады.
«Өткен жылы «Мектепке жол» акциясының негізінде 4 мыңнан аса балаларға көмек көрсетілген болатын. Бүгінде көмекке мұқтаж балалардың тізімін дайындалып жатыр» — деді Түркістан облыстық адами әлеуетті дамыту басқармасы басшысының орынбасары Нұржан Нұрлыбаев.
Спикердің сөзінше, әрбір елді мекенде, қала маңындағы саяжайларда, бөлімдерде, фермаларда «тәуекел тобындағы» балаларды анықтау үшін рейд жүргізілмек. Рейдтердің қорытындысы бойынша тізімдер жасалады. Бұл тізім білім беру органдары мен демеушілерге беріледі.
Сонымен қатар, акция кезеңінде сенім телефондары мен қоғамдық қабылдаулардың үзіліссіз жұмысы ұйымдастырылады.
Брифинг барысында, Түркістан облыстық адами әлеуетті дамыту басқармасының бас маманы Ғалия Әмірәліқызы тізімдер ата-аналардан келісімімен жасалатынын және оған белсенді қатысуға мүмкіндік бар екенін жеткізді.
Айта кетейік, «Мектепке жол — шекарасыз жақсылық» ұранымен өткелі отырған акция 1 тамыз бен 30 қыркүйек аралығында жүзеге асады.
