Түркістан облысында аз қамтылған отбасыдан шыққан 52 мыңнан астам бала мектеп формасымен қамтылады

Бүгінгі күні мектеп формасына қатысты ел ішінде әртүрлі әңгімелер айтылып жатыр. Тіпті, әлеуметтік желіде атаулы әлеуметтік көмек алатын аз қамтылған отбасынан шыққан балаларға мектеп формасы берілмейтін болды деген ақпарат та тарап жатыр. Бүгін Түркістан облыстық адами әлеуетті дамыту басқармасының басшысы Дінислам Болатханұлы аталған мәселелерге жауап берді.
«Облыста атаулы әлеуметтік көмек алатын отбасылардан шыққан кепілдендірілген әлеуметтік пакетімен қамтылған 6-18 жастағы 52660 баланы мектеп формасымен және мектеп құралдарымен қамтамасыз ету үшін 1 857,6 млн. теңге қажеттілігі туындаған болатын. Аталған мәселе шешімін тапты. Бүгіннен бастап барлық мектептер ата-аналардан өтініштерді қабылдауды бастайды. Ата-аналар атаулы әлеуметтік көмек алатындығы туралы құжаттарды береді. Соған сәйкес біз олардың арнайы есеп шоттарына ақшаны аударып береміз», — деді ол.
Биылғы жылы Түркістан облысының оқушылары қара көк түсті форма мен ақ көйлек киеді. Сондай-ақ, ата-ана белгілі бір кәсіпкерге немесе дүкенге байланып қалмай өз жағдайына қарап кез келген жерден мектеп формасын ала алады.
Сондай-ақ, Дінислам Болатханұлы кәсіпкерлер мен қала тұрғындарын «Мектепке жол» акциясына белсенді қатысуға шақырды.