Түркістан төрінде облыс әкімдігінің ұйымдастыруымен Ұлттық мереке – Республика күніне орай 19-20 қазан күндері халықаралық «Voice of turan» қазақ әндері байқауы өтті.
Екі күні бойы әлем елдерінен келген қатысушылар қазақ әндерін шырқап, өз өнерлерін көрсетті. Ашылу салтанатына ТҮРКСОЙ халықаралық ұйымының бас хатшысы Сұлтан Раев, Түркістан облысы әкімінің орынбасары Сәкен Қалқаманов, сонымен қатар еліміздің танымал жұлдыздары мен зиялы қауым өкілдері қатысты.
Ұлы Тұран даласын әнмен тербеген халықаралық байқаудың бірінші күні қатысушылар елімізге танымал эстрада әншілерімен бірге қазақ әндерін шырқап, көрерменге көтеріңкі көңіл күй сыйлады. Екінші күні қатысушылар Шәмші Қалдаяқовтың «Арыс жағасында» әнін бірге орындады. Содан соң байқау талабы бойынша қазақтың танымал әндерін орындап, қазылар алқасының бағасын алды. Әділ қазылар құрамында композитор, ҚР Мемлекеттік сыйлығының лауреаты Төлеген Мұхамеджанов, әнші, ҚР Мемлекеттік сыйлығының лауреаты, Қазақстанның Халық әртісі Нұржамал Үсенбаева, ҚР Еңбек сіңірген қайраткері Медеу Арынбаев, әнші, ҚР Еңбек сіңірген қайраткері Маржан Арапбаева, халықаралық ән байқауларының жүлдегері Жанар Дұғалова, дәстүрлі әнші, ҚР Мәдениет қайраткері, Айгүл Қосанова, композитор, ҚР Мәдениет қайраткері Бекжігіт Сердәлі бар.
Қазылар алқасы шешімімен Грузия елінен келген Татия Кобаладзе Гран-при иегері атанды. Ал 1-орын Татарстаннан келген Ильгиз Шайхразиевқа бұйырды. Жүлделі 2-орынды Сербия елінен Стефан Здравкович пен Польша әншісі Михал Качмарек иеленді. Ал 3-орын иегері черногориялық Катарина Богичевич, Болгария мемлекетінің өкілі Христиана Данкова, өзбекстандық Навруза Махамаджанова атанды.
Түркиядан келген үміткер Сонгул Екан, Беларусь елінің қатысушысы Егор Шаранков және Қарашай-Шеркессиядан Мариана Алботова халықаралық байқау дипломанты атанды. Үздік оранжировка үшін Грузия елінен келген Татия Кобаладзе мен Польша әншісі Михал Качмарек марапатталды. Барлық жеңімпазға арнайы дипломдар мен қаржылай сыйлықтар табысталды.
