20 қараша — ел болашағы үшін өте маңызды күн болмақ. Бұл күні әрбір қазақстандық кемел келешек үшін, баянды болашақ үшін, мемлекетіміздің іргесі берік болуы үшін дауыс беруге міндетті деп санаймын.
Өйткені Президент сайлауы – еліміздегі маңызды демократияны дамытуға жасалған маңызды науқан. Сондықтан бұл сайлауда баршамыз бір кісідей атсалысуымыз керек. Сайлау — көпшілік дауысымен шешілетін мәселе. Бұның халық үшін маңызы зор. Бұл сайлаудың басқа сайлаудан бір өзгешелігі – мұнда Президент бір рет қана, жеті жылға сайланады. Яғни, екінші қайтара сайлауға түсу мүмкіндігі жоқ.
Әділ сайлау – әділетті қоғам үшін ауадай қажет. Сайлаудың әділ әрі шыншыл өтуіне халық мүдделі болуы тиіс деп есептеймін. Бұл ретте, Мемлекет басшысы сайлау науқаны заңға сәйкес өтетініне кепілдік беретінін айтты. Оны отандық және шетелдік байқаушылардың қатысуымен әділ әрі ашық өткізетінін жеткізді.
Қазір қоғам өзгеріп жатыр, халықтың ой-санасы өзгеріп жатыр. Президент сайлауынан күтеріміз көп. Биылғы жылы оң өзгерістер мен жаңашылдық жылы болды. Лайым сол бастамалар өміршең болып, еліміздің іші даудан, сырты жаудан аман болсын. Жаңа әрі әділетті Қазақстанды дамыту үшін жасалып жатқан маңызды қадамдар оң нәтиже береді деген сенімдеміз.
Айдар СЕЙДӘЗІМ,
Ақын, ҚР Жазушылар Одағы Түркістан облыстық филиалының төрағасы
