Бүгін Түркістан облыстық қоғамдық даму басқармасы «Қоғамдық келісім» КММ-ның ұйымдастыруымен 25 қазан — Республика күніне орай «Қыран елім – Қазақстаным» тақырыбында дөңгелек үстел отырысы өтті. Басқосуға Түркістан облыстық этномәдени бірлестіктердің, Түркістан облысы ҚХА жанындағы құрылымдардың жетекшілері мен мүшелері, «Ассамблея жастары» РҚБ Түркістан облыстық өкілдігінің мүшелері, БАҚ өкілдері қатысты.
Келелі жиынды жүргізген Түркістан облысы қоғамдық даму басқармасы басшысының орынбасары Бахыт Ахымбетов қатысушыларды Республика күні мерекесімен құттықтап, мызғымас бірлік пен татулықтың арқасында мемлекетіміз өзінің даму жолында зор жетістіктерге жеткенін атап өтті.
– Бұл күн – ата-бабамыз аңсаған, арманның жүзеге асқан, елімізге еркіндік сыйлаған тарихи күн. Тәуелсіздіктің алғашқы баспалдағы да осы күннен басталады. Қазақстан қашанда өз егемендігін, дербестігін ел ішіндегі тұрақтылықпен, бейбітшілікпен сақтап келді. Табысты реформалардың мызғымас тұғыры – халқымыздың бірлігі. Ал еліміздің бірегейлігі – әр алуан ұлт пен ұлыстың жарасымды татулығы. Осы ретте, «Береке басы – бірлікте» деген қастерлі қағиданы тірек тұтып, жеткен жетістіктерімізді көздің қарашығындай қорғай білуіміз керек, – деді басқарма басшысының орынбасары.
Дөңгелек үстел отырысында Түркістан облыстық ҚХА жанындағы Медиация кеңесінің мүшесі Батырхан Сансызбаев, Түркістан облыстық ҚХА жанындағы Аналар кеңесінің мүшесі Тұрсынай Өсерова, Түркістан қалалық өзбек этномәдени бірлестігі жастар қанатының мүшесі Санжар Апсен сөз алып, 13 жылдан соң қайта қауышқан ұлық мерекенің мән-маңызы мен тарихына тоқталды. Сондай-ақ, Қазақстанның жарқын болашағы үшін бірігіп қызмет етуге шақырды.
Бірлікке үндеген шара «сұрақ-жауап» форматында өрбіп, жиынға қатысушылар ұсыныс-пікірлерін ортаға салды.
Жиын барысында Б.Ахымбетов өңірдегі қоғамдық келісім мен этносаралық бірлікті қамтамасыз етуде, татулық пен достастықты насихаттауда жемісті еңбек етіп жүрген бірқатар азаматтарға Президенттің атынан ҚХА-ның Алғыс хаттары мен медальдарды табыстады.
Бұл ретте, Түркістан облыстық түрік этномәдени бірлестігінің төрағасы Сарманбай Сафаров «Бірлік» алтын медалімен, ҚР ҰҚК Түркістан облысы бойынша департаментінің басқарма басшысы Жанғали Урунбаев Құрмет грамотасымен марапатталды. Сондай-ақ, Түркістан облысы ҚХА жанындағы Журналистер мен блогерлер клубының жетекшісі Ерсұлтан Әмірбекке, Түркістан облысы ҚХА жанындағы Сауран аудандық Аналар кеңесінің төрайымы Нышанкүл Жұмановаға, Түркістан облысы қоғамдық даму басқармасының бас маманы Тимур Оралбековке Алғыс хат табысталды.
