Бүгін Кентау қаласында күзгі тал егу акциясы өтті. Қаланы көркейту-көгалдандыру, көшелерді жасыл желекке айналдыру мақсатында ұйымдастырылған акция аясында 3500 түп ағаш көшеттері отырғызылды. Олардың арасында шырша, қаратал, өрік, туя талдары бар.
Акцияға қатысқан қала әкімі Жандос Тасов көпшілікті көгалдандыру жұмыстарына белсенді қатысуға шақырды. Қалалық мәслихат хатшысы Талғат Балабиев те игі істі қолдау қала тұрғындарының азаматтық борышы екендігін жеткізді. Кентаудың бұрыннан жасыл желекті қала болғандығын айтқан қариялар қауымы бұл бағыттағы жұмыстардың қайта қолға алынғандығына қолдау білдірді.
Игі шараға қала әкімдігі аппараты, дербес бөлімдер мен мекеме қызметкерлеріде белсенді қатысты. Жалпы акция аясында 200-ден астам тұрғын жұмылдырылды.
Айта кетейік, биыл қалада 10 000 ағаш көшеттерін отырғызу жоспарланған. Бүгінгі таңға дейін олардың 6000-ға жуығы отырғызылды. Қалған жұмыстар желтоқсан айына дейін жалғасын табады.
