Түркістан облысы Полиция департаментінің қызметкерлері түрлі қылмыстар мен құқық бұзушылықтардың алдын алу бағытында жыл он екі ай, тәулік бойы қызметте.
Мәселен 12 айда облыс полицейлері 647 960 құқық бұзушылықты анықтап, шара көрген. Оның ішінде автоматты түрде жылдамдықты өлшегіш құралдарының көмегімен жалпы 282 мыңға тарта құқық бұзушылық анықталған.
Тарқатып айтар болсақ, Түркістан облысының тәртіп сақшыларымен көлікті мас халде тізгіндеген 1000-нан астам жүргізуші анықталған. Ал жылдамдықты асырумен 274 мыңға жуық жүргізуші жауапқа тартылған. Қарсы бағытқа шығу бойынша 700-ден астам жүргізушіге шара көрілген. Көлік басқару кезінде ұялы телефон қолданған 7431 тұрғынға әкімшілік хаттама толтырылған. Ал қауіпсіздік белдігін тақпау бойынша 41 мыңнан астам әкімшілік құқық бұзушылық анықталған.
Облыс бойынша 870-тен астам жүргізуші көлік басқару құқығынан айырылған. Жол ережесін бұзған 40 мыңға жуық жаяу жүргінші жауапқа тартылған.
