Облыс көлемінде 7 аудан, қалада 20 орталықтандырылған жылу қазандықтары және 1 жылу-электр орталығы бар.Кентау қаласын жылумен қамтамасыз ететін «Кентау Сервис» МКК №5-ЖЭО негізгі жабдықтарының тозу деңгейі 85 пайызды, ал жылу желілерінің тозу деңгейі 40 пайызды құрайды. Бүгінгі күні 6,6 км магистральдық жылу желілері мен 6 қазандықты және 1 турбогенераторды күрделі жөндеу бойынша, жобалау сметалық құжаттамасы әзірленуде.
Облыс әкімінің бірінші орынбасары Арман Жетпісбай жаңа 2023 жылдың алғашқы күнін коммуналдық қызмет саласының жұмысшыларымен кездесуден бастады. Кентау қаласындағы жылу орталығының жұмысын тексерді. Қысқы маусым кезінде басқа өңірлерде жылу мекемелерінде орын алып жатқан төтенше жағдайдың алдын алу бойынша атқарылып жатқан жұмыстарды бақылады.
Бүгінде Кентауда 100 мыңнан астам халық тұрады. Ондағы №5 жылу энергия орталығы қалыпты режимде жұмыс істеуде. Жылу беру температуралық кесте бойынша жүзеге асып жатыр. Орталықтандырылған жылуға қосылған 14 мың абонент бар. Барлығы толық жылу жүйесімен қамтамасыз етілген. Оның 106-сы бюджеттік мекемелер, 336 көпқабатты тұрғын үй, 2250 жеке сектордағы үйлер, 4 мыңдай коммерциялық нысан аталған орталықтан жылу алуда.
2022-2023 жылдары жылыту маусымын сапалы және үзіліссіз өткізу мақсатында Түркістан облысы әкімдігінің қолдауымен, №5 ЖЭО негізгі және қосалқы қондырғыларын, №7,8,11,12 қазандықтарын, №3 турбогенераторды ағымдағы жөндеуге қажетті қаржы қарастырылған. «Қазіргі уақытта ағымдағы жөндеу бойынша барлық жұмыстар толығымен аяқталған», — дейді сала мамандары.Сонымен қатар, 2022-2023 жылдардағы жылу маусымына қажетті 90 000 тонна қатты отын (көмір), 700 тонна сұйық отын (мазут) және 20 тонна дизельге келісімшарт түзілді.
Жоғарыда айтып өткеніміздей, Кентаудағы №5 жылу энерго орталығының тозығы жеткен. Бұл нысан 1934 жылы салынған екен. Бюджеттен бөлінген қаражат электр стансалары мен жылу желілері жабдықтарының ағымдағы жөндеу жұмыстарына ғана жететін көрінеді. Сондықтан, қазіргі таңда Кентаудан жаңа жылу орталығын салу мәселесі күн тәртібінде қаралуда. «Жаңа жылу энергоорталыққа қатысты екі жоба жасалған. Оның бірі – жылу орталығын табиғи газға қосу, екіншісі – жаңа жылу энерго орталығын салу», — дейді мамандар.
