Созақ ауданында 35 елді мекеннің 29-ы (2 кент, 26 ауылдық елді мекен) орталықтандырылған ауыз сумен қамтамасыз етілген. Оның екеуі кент болса, 26-ы ауылдық елді мекендер. Жалпы ауданда барлығы 61715 тұрғын таза ауыз сумен қамтылып отыр.
Орталықтандырылған ауыз су құбыры бар 29 елді мекеннің 23-іне ауыз су 24 сағат берілсе, қалған алтауына түзілген кестеге сәйкес берілуде.Шолаққорған ауылы тұрғындарын тәулігіне 24 сағат ауыз сумен қамтамасыз ету үшін «Шолаққорған ауылының Ақшам және Наурыз мөлтек аудандарын ауыз сумен қамтамасыз ету құрылысы» жобасы түзілді. Жоба бойынша атқарылуы тиіс құрылыс-монтаждау жұмыстарына былтыр қазынадан 51,0 млн.теңге бөлінді. Мұндағы тиісті жұмыстар әлі де жалғасын табуда. Өйткені, нысан 2023 жылға өтпелі болған.
Құмкент ауылындағы ауыз су тарату нысанындағы су тазарту қондырғыларына ағымдағы жөндеу жұмыстары жүргізіліп, өткен жыл соңында, 2022 жылдың қараша айынан бастап, аталған ауыл тұрғындары тазартылған таза ауыз сумен тәулігіне 24 сағат қамтылды.
Ал, Созақ, Шақырық елді мекендерінің тұрғындарын тәулігіне 24 сағат ауыз сумен қамту мақсатында Түркістан облысының энергетика және тұрғын үй-коммуналдық шаруашылық басқармасы тарапынан жер асты су қоры бекітіліп, 2021 жылы ауыз су тарату нысаны үшін мемлекеттік жер актілері алынып, сәулет-жоспарлау тапсырмасы әзірленген болатын. Оның жобалау-сметалық құжаттамаларын әзірлеуге аудандық бюджеттен 2023 жылға 17 140,407 мың/тг қаржы бөлініп отыр. Алдағы уақытта жобалаушы мекеме анықталып, нысанның жобалық сметалық құжаты әзірленетін болады.
Қаратау ауылының да тұрғындарын тәулігіне 24 сағат таза ауыз сумен қамтамасыз ету үшін жобалық-сметалық құжат әзірлеуге қажетті 12 453,63 мың теңге бөлу жөнінде сұраныс аудандық бюджеттік комиссияға берілді. Қаржы бөлінген жағдайда жобалық-сметалық құжат әзірленетін болады.
Сызған елді мекенінің тозығы жеткен су құбырларын қайта жаңғырту үшін қазіргі таңда жобалау-сметалық құжаттама әзірленуде. Ағымдағы жылы мемлекеттік сараптаманың оң қорытындысы алынатын болса, бюджетке сұраныс берілетін болады. Сонымен қатар, бимыл Қарақұр, Қозмалдақ ауылдары тұрғындарын тәулік бойы ауыз сумен қамту мақсатында облыстық басқарма арқылы жер асты су қорын зерттеу жұмыстары басталды. Жер асты су қоры бекітілгеннен кейін нысанның жобалық-сметалық құжаттамасы әзірленетін болады.
Айта кетейік, ауданда 6 ауылдық елді мекен, атап айтар болсақ, Қарабұлақ, Балдысу, Басбұлақ, Саржаз, Қақпансор, Қоңыратарық елді мекендері ауыз сумен қамтамасыз етілмеген. Оның ішінде, 4 елді мекенге су құбырларын жүргізу, 2 елді мекенге, атап айтар болсақ, Қақпансор мен Қоңыратарық елді мекендеріне блок-модуль кешенін орнату жоспарлануда. Бұдан бөлек 4 елді мекенді, атап айтар болсақ, Саржаз, Балдысу, Қарабұлақ, Басбұлақ елді мекендерін орталықтандырылған ауыз сумен қамтамасыз ету үшін ауыз су тарату нысанына мемлекеттік жер актілері алынып, сәулет-жоспарлау тапсырмасы әзірленген. Ағымдағы жылы жобалық-сметалық құжаттамасы әзірленіп, мемлекеттік сараптама қорытындысы алынатын болады.
Ауыз сумен қамтамасыз етілмеген 6 елді мекенде бірқатар жұмыстар атқарылуда. Айталық, 2 елді мекенде Қақпансор мен Қоңыратарық елді мекендерінде халық саны 200-ден кем болғандықтан, онда блок-модуль кешенін (КБМ) орнату қажеттігі туып отыр. Ағымдағы жылы Түркістан облысының энергетика және тұрғын үй-коммуналдық шаруашылық басқармасы тарапынан жер асты су қоры бекітілетін болады. Мұнан басқа 4 елді мекенде, атап айтар болсақ, Қарабұлақ, Балдысу, Басбұлақ, Саржаз елді мекендеріндеатқарылуы тиіс жұмыстардың жобалау-сметалық құжаттамаларын әзірлеуге қажетті7 646,824 мың/теңгеге Түркістан облысының энергетика және тұрғын үй-коммуналдық шаруашылық басқармасына сұраныс берілді.
