Мақтаарал ауданында аудан әкімінің тапсырмасымен аудан әкімдігі және төтенше жағдайлар бөлімінің мамандары бірқатар елдімекендерде болып, су реттегіштер мен қар суы жиналатын орындарды бақылады.
Жалпы аудан аумағында су тасқынына алып келетін өзен, көл, су қоймалары, гидротехникалық құрылыстар жоқ. Дегенмен, Өзбекстан Республикасы «Сырдария» аумақтық су шаруашылығы бірлестігінің есебіндегі «Достық» магистральды каналы арқылы ауданға ағын су жеткізіледі. Қазіргі таңда каналдың қауіп төнетін авариялық аймақтары жоқ. Соған қарамастан, каналға бақылау бекеттері ұйымдастырылып, диспетчерлік кезекшілік қойылған.
Негізінен, Мақтаарал ауданында жыл сайын ақпан, наурыз айларында жауатын нөсер жаңбыр мен егістік жерлерді қысқы сор шаю жұмыстарын жүргізу салдарынан жер асты суларының деңгейі көтеріледі. Егістік жерлердің қысқы сор шаю жұмыстарының көктемге дейін созылуы, көктемгі жауын-шашынға ұласып, жер астына сіңбейді. Соның салдарынан аумақтардан су тартып шығару қиындап, тұрғын үйлердің аулаларын су басады.
Бүгінде төтенше жағдайлардың алдын алу мақсатында Атакент кентінде 4 көшеге жаңадан лотоктар салынды. Аудан көлемінде 147,86 км ирригациялық жүйелер және арық-атыздардың арналары тазаланды. Кенттер мен елдімекендердің ішінде орналасқан 38 тік дренаж бен егістік жерлерде орналасқан 145 тік дренаж іске қосылуға дайын. Сондай-ақ, су басу және су тасқыны мерзімінде шұғыл жеткізілетін 84 мотопомпалар сақадай сай.
