Түркістан қаласында мәдени-спорттық, туристік және өзге де ғимараттар салынды. Қала жаңа өрлеу дәуірін бастан өткеріп жатыр. Нәтижесінде халық саны да артып, қосымша мектептер қажеттілігі артуда.
Осыған байланысты Мемлекет басшысы Қасым-Жомарт Тоқаевтың бастамасымен «Жайлы мектеп» жобасы аясында Түркістан қаласында 7 мектеп салынады. Бұл жайында облыс әкімі Дархан Сатыбалды Түркістан қаласы тұрғындарымен кездесуінде айтты.
— Біз білім саласын дамытуға басымдық беріп отырмыз. Осы сала реттеліп, білімді жастар өссе, өзге мәселелер де шешіледі. Мәселен, «Жайлы мектеп» жобасымен шаһардың «Әкімшілік-іскерлік орталығында» 2 000 орындық 3 мектептің, «Яссы» мөлтек ауданында 1 200 және 900 орындық 2 мектептің, «Отырар» және «Бекзат» мөлтек аудандарында 1 200 орыннан 2 мектептің құрылысын жоспарлап отырмыз.Бұл мектептер алдағы екі жылда пайдалануға беріледі. Сонымен қатар, 500 орындық жатақханасы бар жалпы 700 орындық «Дарын» мектеп-интернатының құрылысы жүріп жатыр. Сондай-ақ, биыл қалада қазақ, орыс, ағылшын, түрік тілдерінде білім беретін жаңа үлгідегі «НҰРОРДА» халықаралық мектебі салынатын болады, — деді Дархан Амангелдіұлы.
