Арыс қаласында 32 елді мекен бар. Онда 78886 адам тұрады. Сол елді мекендердің25-і, яғни 78483 адам орталықтандырылған ауыз сумен қамтамасыз етілген. Бұл аудан халқының 99,3 пайызын құрайды. Шалғайда орналасқан 7 елді мекен құдық суымен қамтылған. Ол 7 елді мекенді 403 адам мекендеген.
Арыс қаласының тұрғындарын 3 мекеме ауыз сумен қамтамасыз етеді. Атап айтар болсақ, «Оңтүстік ауыз су» филиалына қарасты «Арыс топтастырылған су жүйесі» өндірістік бөлімшесі 4 елді мекендегі 47954 халықты, 10590 абонентті қамтыған. Ал, «Теміржолсу-Арыс» ЖШС-гі 5 елді мекендегі 10500 халықты, 2100 абонентті қамтуда. «Ақаба Сервис» ЖШС-гі 16 елді мекендегі, 20029 халықты, 4005 абонентті ауыз сумен қамтамасыз етуде.
Бүгінгі таңда қалада құрылыс-монтаждау жұмыстары жүргізіліп жатқан нысандар саны – бесеу. Олардың барлығы биылғы жылға өтпелі нысандар болып табылады. Сонымен қатар, қазір қаланың ішкі жүйелеріне су құбырларын жүргізу үшін 4 нысанның жобалық сметалық құжаттамалары дайындалып, сараптама қорытындысы алынды.
Реті келгенде өңірде геологиялық іздеу-барлау жұмыстары бойынша атқарылған жұмыстардың да барысына тоқтала кетсек. Арыс қаласы бойынша 2015-2021 жылдар аралығында 8 елді мекенгежер асты су қорлары барланып, пайдалануға берілді. Атап айтар болсақ, олар: Екпінді, Шөгірлі, Көкжиде, Орманшы, Аққала, Шағыр, П.Арапов, Ақдала елді мекендері.Бүгінгі таңда Арыс қаласы бойынша геологиялық іздеу-барлау жұмыстары қажетті елді мекендер тізімі нақтыланып, тиісті мекемеге хат жолданды. Оларды да атай кетсек:Қаражантақ, Монтайтас, Қабылсай, №42 Разьезд, Бақырша, Көкжиде, Байырқұм елді мекендері.
