Жетісай ауданында 112 елді мекеннің 105-і орталықтандырылған электр желісіне қосылған. 7 елді мекен шалғайда (құмда) орналасуына байланысты экономикалық тиімсіз болуына байланыста электр желілерімен қамтылмаған. Атап айтар болсақ, олар: Орысқұдық, Серікбай, Жорабек, Пірәлі, Жібекші, Қалпақсай, Батырхан елді мекендері. Жаңа ауыл ауылдық округіндегі 3 елді мекеніндегі жаңадан құрылған көшелерінің жобалық сметалық құжаты әзірленіп, оған қазынадан 499 млн теңге бөлінді.
Абай ауылдық округіндегі 4 елді мекенге, Ж.Ералиев ауылдық округіндегі 8 елді мекенге электр желілерін жүргізуге және трансформатор (КТП) орнату үшін нысанның жобалық сметалық құжаты әзірленуде.
Реті келгенде айта кетейік, жалпы Түркістан облысы – электр қуатына тапшы өңірлердің бірі. Аймақтың орташа қажеттілігі 320 МВт/сағ құрайды. Оның 20%-ын ішкі энергетикалық көздер өндірсе, 80%-ы еліміздің солтүстік өңірінен және Шымкент, Тараз қалаларындағы стансалардан тасымалданады. Облыс аумағындағы 831 елді мекеннің 815-і орталықтандырылған электр желісімен қамтылған. Қалған шалғайдағы 16 елдімекен дербес электр қондырғыларын пайдалануда. Биыл 40 нысанның құрылысын аяқтап, 47 елді мекендегі 122,3 мың тұрғынды сапалы электр қуатымен қамту көзделіп отыр.
