Сарыағаш ауданында елді мекендерді сапалы электрмен қамтамасыз ету бағытындағы жұмыстар қарқынды түрде жүргізілуде. Сала мамандарының мәлімдеуінше, қазіргі энергия көздері бойынша қосымша су электр станциясы пайдалануда. Сондай-ақ қосымша тағыда бір шағын су электр станциясын салу жоспарлануда.
Осыған орай жақында аудан әкімі Арман Абдуллаев ауданымыздағы электр энергияларды өндіру саласын дамытып келе жатқан «Келесгидрострой» ЖШС-нің жұмысымен танысу мақсатында Жарты төбе ауылдық округі, Құрама елді мекені аумағындағы, Келес өзенінің бойында орналасқан 4,5 МВт электр қуатын өндіретін «Дархан» шағын су электр станциясына барды.
Аталған су электр станциясының құрылыс жұмыстары 2017 жылы басталып, 2019 жылы пайдалануға берілген. Қазіргі таңда мұнда 10 адам тұрақты жұмыспен қамтылып, Жарты төбе және Құркелес ауылдық округінде 2000 абонентті электр қуатын қамтамасыз етуде.Сонымен қатар, аудан басшысы «Келесгирострой» ЖШС-нің Қабланбек ауылдық округі, Ташқұлақ елді мекенінде жоспарланудағы су электр станциясының жерімен танысты.
Айта кетейік, былтыр ауданда жалпы 18,3 шақырым электр желісі тартылып, 1043 электр бағанасы мен 15 дана трансформатор орнатылған. Сонымен бірге, былтыр ұзындығы 40 шақырымды құрайтын 38 ішкі жолға орташа жөндеу, ұзындығы 43 шақырымды құрайтын 22 ішкі жолға шағал тас төсеу жұмыстары жүргізілді. Ал, биыл 26,5 шақырымды құрайтын 17 ішкі жолға орта жөндеу жұмыстары жүргізіледі.
Аудандағы 68 елді мекеннің 42-сі, яғни 61,8 пайызы орталықтандырылған ауыз сумен қамтылған. Аймақты табиғи газбен қамту көрсеткіші қазіргі таңда 76,1 пайызды құрайды.
