Ш.Қалдаяқов атындағы мәдениет сарайында «Экономикалық қауіпсіздік: өркендеумен тұрақтылық кепілі» акциясы өтті. Облыс аумағына қарасты қала, аудандарда, шалғай жатқан ауылдарда экономикалық қауіпсіздікті қамтамасыз ету, сауатты құқықтық кеңес беру, қарапайым халықтың қаржылық қауіпсіздігін және сауаттылығын арттыру, қаржылық пирамидалардың алдын-алу мақсатында ұйымдастырылған акцияға қала әкімінің орынбасары Ақнұр Байболова, қалалық мәслихат төрағасы Қаблан Елеусизов және Түркістан облысы бойынша Экономикалық тергеп-тексеру департаментінің Тергеу басқармасы басшысы Қуаныш Айтбаев қатысты.
Акцияда баяндама жасаған Қуаныш Айтбаев қаржылық пирамидалардың кесірі, алаяқтарға алданбау, қаржылық сауаттылық тақырыптары бойынша баяндама жасап, кең көлемде мәлімет берді.
Ал, Жұмыспен қамту орталығының директоры Райхан Егембердиева мемлекет тарапынан беріліп жатқан қайтарымсыз гранттар туралы айтып өтсе, «Атамекен» ұлттық кәсіпкерлік палатасының Кентау филиалы төрағасы Мұрат Садуов жеңілдетілген несиелер мен кәсіпкерлерді қолдауға арналған мүмкіндіктерді түсіндірді.
Айта кетейік, «Экономикалық қауіпсіздік: Өркендеу мен тұрақтылық кепілі» акциясын ұйымдастыру үшін қала әкімдігі жанынан арнайы жұмыс тобы құрылған болатын. Оның құрамына Жұмыспен қамту орталығы, саяси партиялар мен үкіметтік емес ұйымдардың лидерлері, жергілікті мәслихат депутаттары, зиялы қауым өкілдері, ақсақалдар алқасы, педогог-ғалымдар, «АТАМЕКЕН» ҰКП, ассамлея мүшелері мен БАҚ өкілдері енді.
