Жақында Сарыағаш аудандық полиция бөліміне жергілікті тұрғын арызданды. Әйел адамның айтуынша, Өзбекстан Республикасынан Қазақстанға көшіп келген кезде өзінің танысы «Қазақстан азаматтығын алып беремін» деп уәде беріп, алаяқтық жолмен 300.000 теңгесін жымқырған.
Аталған фактіні полицейлер ҚР ҚК-нің 190 бабы «Алаяқтық» бойынша тіркеді. Тәртіп сақшылары жедел-іздестіру жұмыстарын жүргізіп, нәтижесінде күдіктінің жеке басын анықтады. Ол жергілікті тұрғын болып шықты. Анықталғандай, күдікті ер адам көрші елден қоныс аударған жәбірленушіге төлқұжатын заңдастырып беремін деп уәде беріп, ақшасын өзінің қажетіне жаратып жіберген. Қазіргі таңда күдіктіге қатысты тергеу амалдары жүргізілуде.
Қазіргі таңда осындай алаяқтық әрекеттер өршіп тұр. Алаяқтардың айла-тәсілдері де күн сайын өзгеріп, жаңара түсуде. Сондықтан, полицейлер тұрғындарға әрдайым сақ болу керектігін ескертеді. Өңірімізде алаяқтық әрекеттерді болдырмау мақсатында Түркістан облыстық полицей департаменті жанынан «CyberPol» арнайы тергеу-жедел тобы құрылған болатын. Аталмыш топ мүшелері қоғамымызда алаяқтық әрекеттерге тосқауыл қою мақсатында нақты шараларды қолға алуда. Соның нәтижесінде айласын іске асырғысы келетіндер қолға түсіп жатыр. Солардың бірі жоғарыда атап өткендей жәбірленушіні «Қазақстан азаматтығын алып беремін» деп алдаған азамат.
Соңғы уақытта мемлекетімізде құқық қорғау саласында көптеген реформалар іске асырылуда. Соның негізінде салада ауқымды жұмыстар атқарылуда. Ел Президенті Қасым-Жомарт Тоқаев қаңтар оқиғасынан кейін полиция жұмысын жетілдіру бағытында нақты шаралар қабылдауды тапсырған болатын. Ол халықтың мүддесін қорғауға бағытталған полиция құру еді. Осы мақсатта өңіріміздегі құқық қорғау саласында цифрландыру және оңтайландыру бағыттарына басымдық беріліп, нақты шаралар қолға алынды. Бірнеше пилоттық жоба іске асырылды. Соның бірі жоғарыда атап өткен «CyberPol» арнайы тергеу-жедел тобы.
Айтайын дегеніміз, аталмыш топ мүшелері таяуда 45 алаяқтық қылмысқа қатысы бар азаматты да қамауға алды. Мұның өзі үлкен көрсеткіш. Бүгінге дейін облысымызда интернет арқылы 56 қылмыс жасаған 31 адам ұсталды.
Облыстық полиция департаментінің бастығы, полиция генерал-майоры Мұрат Қабденовтың мәлімдеуінше, биылғы жылдың алғашқы 5 айында Түркістан облысында 2193 қылмыстық құқық бұзушылық тіркелді. Өткен жылмен салыстырсақ, бұл көрсеткіштен қылмыстың едәуір төмендегенін байқауға болады. Оның ішінде ауыр қылмыстар 25,4 пайызға, ұрлық 32,2 пайызға, пәтер ұрлығы 33,9 пайызға, бұзақылық 24,7 пайызға, алаяқтық 16,7 пайызға кеміді. Қоғамдық орындарда жасалған қылмыстар 13,6 пайызға азайды.
