Сауран ауданындағы №2 жалпы орта мектепте ата-аналарды педагогикалық қолдау орталығының ұйымдастыруымен 1-4 сыныпта оқитын оқушылардың ата-аналарына «Құмар ойындары – тәуелділік қақпаны» атты тақырыпта сынып сағаты өткізілді. Онда «балалардың компьютерлік ойындарға тәуелділігін қалай жеңуге болады?» деген сұрақ төңірегінде ой қозғалып, ата-аналар мен ұстаздар пікір алмасты.
Сонымен қатар, психологиялық тренинг, ситуациялық сұрақтар және дидактикалық ойындар арқылы балаларды құмар ойындар мен компьютер ойындарына тәуелді болудан сақтауға болатыны айтылды. Ата-аналар сынып сағатында белсенділік танытып, алдағы уакытта да ата-ана, оқушы, мұғалім арасындағы ынтымақтастықты арттыру бағытындағы жұмыстарды жүйелі түрде бірге ұйымдастыруға уағдаласты.
Айта кетейік, бүгінде Сауран ауданында 54 (12 жекеменшік) мектеп бар. Онда 3 мыңнан астам педагог жұмсы істейді. Педагогтардың 51-і «педагог-шебер», 507 -сі «педагог-зерттеуші», 813 -і «педагог-сарапшы», 756-сы «педагог-модератор», 1071–і «педагог»санатын иеленген. Өткен жылы біліктілік арттыру курсынан өту үшін 734 педагогке сұраныс беріліп, барлығы курстан толықтай өтті. «Өрлеу» БА орталығы АҚ Түркістан облысы және Шымкент қаласы бойынша кәсіби даму институты ұйымдастырған курстарда 473, Педагогикалық шеберлік орталығы базасында 163 педагог, Адамның үйлесімді дамуы ұлттық институты тарапынан ұйымдастырылған курстарда 98 педагог біліктілік арттыру курстарынан өтіп, білімдерін жетілдірді.
