Түлкібас аудандық білім бөлімі жанындағы әдістемелік кабинеттің әдіскері М. Құлмағанбетова «Қарлығаш» бөбекжай-бақшасында «Ертегі терапиясы арқылы мектеп жасына дейінгі балалардың шығармашылық әлеуеті мен қабілеттерін дамыту құралы» тақырыбында аудандық семинар өткізді.
Іс-шараның мақсаты ертегі терапиясы арқылы мектеп жасына дейінгі балалардың тілін дамыту, сөздік қорын молайту, байланыстырып сөйлеу дағдыларын қалыптастыру, баланың қиялын және шығармашылық ойлау қабілетін арттыру болды.
Тәжірибелік семинарда аталған мекеменің педагог-психологы Н.Нұрлыбаева «Ертегі терапиясы» атты авторлық бағдарламасын көпшілік назарына ұсынып, таныстырды. «Арайлым» бөбекжай-бақшасының педагог-психологы А.Қалдарова «Бала мен ата-ана қарым-қатынасы» тақырыбында ата-аналармен тренинг өткізді. «Балдырған» бөбекжай-бақшасының педагог- психологы Р.Тулегенова «Мектеп жасына дейінгі балаларға ертегі терапиясын қолдану арқылы шығармашылық ойлауын дамыту» тақырыбында педагогтармен рөлдік ойындарды сахналау әдісімен тренинг жүргізді.
Іс-шараға қатысқан ұстаздар қорытынды кезеңде өз ойларымен бөлісті.
Айта кетейік, бүгінде ауданда 51 мектепке дейінгі ұйымдар жұмыс істейді. Оның 15 мемлекеттік балабақша болып табылады. Онда қазір 2003 бала, ал жекеменшік 33 балабақшада — 3843 бала,3 шағын орталықта–100 бала тәрбиеленуде. Ауданда барлығы 5946 бала балабақшаға барады. Мектепке дейінгі ұйымдар бейнебақылау камераларымен 100 пайыз қамтамасыз етілген.
