Кентау қалалық білім бөліміне қарасты мектептерде 9-11 сыныптарда оқитын 43 оқушы облыстықпән олимпиадасына жолдама алған болатын.
Білім бәйгесінің облыстық кезеңіне аттанған 43 оқушының 37-сі жүлдемен оралды.
Үздік деп танылған осы оқушылардың арасында үш оқушы пән олимпиадасының республикалық кезеңінде жүлделі орындарды иеленіп, жоғарғы оқу орнындарының оқу грантын жеңіп алды. Оқуын тереңдетіп ғылымға ден қойған осы 3 оқушы ғылыми жобалар бойынша жүлдеге ие болды.
Жақында қалада жеңімпаз оқушыларды марапаттау, оларға қолдау көрсету мақсатында «Білімді жас — ұлт болашағы» атты салтанатты іс-шара өтті. Білімді мақсат тұтқан жастар мен олардың жетекшілері және ата-аналарына қала әкімінің, білім бөлімінің алғыс хатымен марапатталды.
Айта кетейік, Кентау қаласында бүгінде 27 білім беру ұйымы жұмыс істеп тұр. Оның 23-і мемлекеттік мектеп болса, 4-еуі жекеменшік. Балалар қауіпсіздігін сақтау мақсатында барлығы бақылаумен қамтамасыз етілсе, қашықтан қатынайтын оқушыларды тасымалдауға 2 автобус берілген. Жаңа оқу жылынан бастап бастауыш сыныпта оқитын 7771 балаға бір реттік ыстық тамақ үлестірілуде.Өткен жылы жеке инвесторлар есебінен Кентау қаласы мен Қарнақ ауылында 2 мектеп пайдалануға берілді. Оған қоса Қарнақ ауылында балаларға арналған 300 орынды сауықтыру лагерінің құрылысы жүргізіліп жатыр. Құны 300 млн. теңгені құрайтын нысан биыл пайдалануға беріледі. «Жайлы мектеп» ұлттық жобасы шеңберінде 2025 жылы қала аумағында 1 200 орынды 2 мектеп пайдалануға беріледі деп жоспарланып отыр.
