Шардара ауданындағы «Шардара» мектеп-лицейінде болашақ ұрпақтың тәрбиелі, өнерлі болып өсуін және ата мен әженің, әке мен ананың, жеңге мен қайынсіңлі арасындағы өзара сыйластықты нығайтып, тұлғалық сипатын қалыптастырып, ата-ананың мектеппен тығыз байланысын арттыру мақсатында аймақтық семинар өтті.
«Отбасы құндылығы – сарқылмас қазына» атты тақырыпта өткен семинарға ауданның құрметті азаматы, ардагер Қ.Інайұлы, аудандық медиатор төрағасы Ж.Битуов, аудандық «Ақ әжелер» ансамбілінің мүшесі, ардагер ұстаз Ж.Зияшқызы, аудандық «Аналар» кеңесінің төрайымы Г.Исаева, мектепішілік ата-аналар кеңесінің төрағасы С.Лаханов, қамқоршылық кеңес төрағасы М.Мархабай, «Әкелер» мектебінің төрағасы Ә.Башқараев, аудандық білім бөлімінің әдіскерлері Г.Шамиева мен Д.Маметова, аталмыш мектеп-лицейдің директоры Ж.Сапаров, ДТІЖО Г.Ахатова және ата-аналар қатысты.
«Отбасы – тәрбие басы, мектеп – тәрбие жаршысы» атты тақырыпта баяндама жасаған қазақ тілі мен әдебиеті пәнінің мұғалімі С.Жексенбаева отбасылар арасында ұлттық құндылықтарды насихаттады. Семинарды мектеп-лицейдің директоры ашып беріп, тәрбие бағытындағы өзекті мәселелерді қозғап, үздік, белсенді оқушылардың ата-аналарына алғысын білдірді.
Айта кетейік, бүгінде аудандағы 20 мыңға жуық оқушы 31 мектепте білім алса, 5 мыңға тарта бүлдіршін 41 балабақшада тәрбиеленуде. Барлық мектеп ұялы байланыс және интернет желісімен жабдықталған.
