Ахмет Байтұрсынұлы Ұлттық ғылым Академиясының ұйымдастыруымен бір жыл бойы мектеп мұғалімдері арасында “Үздік оқырман” байқауын өткізген болатын. Байқауға республиканың түкпір-түкпірінен 3 мыңға жуық оқырман ұстаздар қатысты. Алғашқы кезеңге 5 роман, повесть жанрындағы шығармалар оқуға ұсынылды. Қатысушылар оқылған кітаптар мазмұны бойынша онлайн түрде сауалдарға жауап беріп, сауатты жазу, логикалық тереңдігі тұрғысынан арнайы критерийлер бойынша бағаланды. ІІ-кезең қазан айында өтіп, отандық және әлем әдебиеті классиктерінің романдарын оқып, сұрақтарға жауап берді. Осы кезеңде жоғары ұпай жинаған мектеп мұғалімдері жүлделі орындарды иеленді.
Айталық, Сарыағаш ауданындағы №18 санды “Абай” жалпы орта мектебінің мұғалімі Ақжарқын Смаилова “Үздік оқырман” байқауының барлық кезеңіне қатысты. Осылайша сарыағаштық ұстаз республикалық сайыстың ақтық кезеңінде жүлделі ІІІ орынды қанжығасына байлады. Сондай-ақ, жеңімпаз мұғалімдерді Астана қаласындағы Ы.Алтынсарин атындағы Бином мектебінің базасында салтанатты түрде марапаттап, оларға ақшалай сыйлықтар мен мақтау қағазы табысталды.
Реті келгенде тілге тиек ете кетейік, бүгінде саялы өлкеде «Жайлы мектеп» ұлттық жобасы аясында 4 нысанның құрылысы басталса, Бағыс елді мекеніндегі 300 оқушыға лайықталған мектептің құрылысы аяқталып, білім ордасы оқушыларды қабылдаған. Нұрлы жол және Сарысу елді мекендеріндегі мектептің құрылысы да қолға алынған болатын.
