Созақ ауданындағы Нәзір Төреқұлов атындағы IT мектеп-лицейінде биология және химия пән бірлестігі мұғалімдерінің ұйымдастыруымен «Жаратылыс сыры – ғылымда»атты тақырыпта апталықтың ашылу салтанаты өткізілді. Онда мектептің директоры Мамырғали Құрманбекұлы сөз сөйлеп, іс-шараны ашып берді. Мұнан кейін биология пәні ұстаздары ән орындап, оқушылар биология, химия пәндеріне арнаған өлең жолдарын оқыды.
Апталықтың мақсаты оқушылардың биология, химия пәндеріне деген қызығушылығын арттыру және оқыту кезінде білімдерін қорытып, тереңірек дамыту болды. Оқушылардың бойында салауатты өмір сүру жайлы түсініктерін қалыптастыру және олардың іскерлік қабілеттерін ояту.
Апталық барысында оқушылар арасында «Көңілді үзіліс» ойыны өткізілді. Ойын барысында жеңімпаз болған оқушылар марапатталды.
16-шы ақпанға дейін жалғасатын апталық аясында алдағы уақытта ашық сабақтар мен түрлі қызықты сайыстар өткізіледі.
Бүгінде Созақ ауданында типтік мектептер саны — 33, ыңғайластырылған мектептер саны – 2. 2023-2024 жаңа оқу жылында 1 сыныпқа 1528 оқушы қабылданып, жалпы аудандағы оқушылар саны 15468-ді (МАД тобында-1219) құрады.
2022-2023 оқу жылында «Өрлеу» республикалық біліктілікті арттыру ұлттық орталығынан (Алматы қаласы) — 21, «Өрлеу» біліктілік арттыру орталығынан (Шымкент қаласы) –171 , АОО «НИШ» ЦПМ –135 педагог біліктілігін арттырды. Жалпы өткен жылы барлығы 335 педагог біліктілігін арттыру курсынан кезең-кезеңімен өткізілді. Алдағы уақытта да мұғалімдердің біліктіліктерін көтеру мақсатында тиісті жұмыстар жалғасын табатын болады.
Аудандағы 2231 педагогтың 2182-і жоғары білімді, 49-ы арнаулы орта білімді. Мұғалімдерді санаттары бойынша жіктейтін болсақ, Мұғалімдердің 38-і «шебер-педагог», 513-і «зерттеуші-педагог», 387-і «сарапшы-предагог», 381-і «модератор-педагог», сондай-ақ, 46-ы жоғары санатты, 58-і бірінші санатты, 97-і екінші санатты, 711-і лайықты мұғалім.
Айта кетейік, ағымдағы жылдың 7-14 шілде аралығында Астана қаласында биологиядан IBO-2024 35-ші халықаралық олимпиадасы өтеді. Бұл туралы ҚР Президенті жанындағы Орталық коммуникациялар қызметінде өткен брифингте Орта білім комитетінің төрағасы Қаныбек Жұмашев мәлімдеді.
Халықаралық биология олимпиадасы (IBO) – әлем елдерінің орта мектеп оқушылары арасындағы ең бәсі жоғары бәсеке және білім саласындағы ең ауқымды шаралардың бірі. Қазақстандық мектеп оқушылары ғылыми жарысқа 1996 жылдан бері қатысып келеді. Осы уақыт ішінде олар 2 алтын, 20 күміс, 54 қола медаль және 14 құрмет грамотасын жеңіп алды. Бұл жоғары көрсеткіш болып саналады. Қазақстанның мұндай беделді іс-шараны өткізу орны ретінде таңдалуы да сондықтан.
Биылғы олимпиадаға 80 елден 350 оқушы қатысады деп күтілуде. Додада 40-тан астам жүлде таласқа салынады. Еліміздің құрама командасы сапында төрт оқушы бар.
«Оқу жылының басынан бастап олимпиада тапсырмаларын халықаралық деңгейде әзірлеу бойынша айтарлықтай жұмыстар атқарылды. Тапсырмалар биохимия, молекулалық биология, биоинформатика, анатомия және жануарлар физиологиясы саласын қамтиды. Бүгінгі таңда биологиядан Қазақстанның олимпиадалық құрамасы алдағы жарыстарға қызу дайындалуда. «Дарын» орталығында оқу-жаттығу жиындары өтуде. Олимпиада аясында қазақстандық педагогтер үшін биологиядан олимпиада есептерін шешу бойынша шеберлік сабақтары, семинарлар және әлемнің жетекші ғалымдарының ғылыми-тәжірибелік конференциялары өтеді», — деп атап өтті комитет төрағасы.
Еске салайық, өткен жылдың қараша айында Қазақстан Республикасының Оқу-ағарту министрі Ғани Бейсембаев пен IBO Халықаралық ұйымдастыру комитетінің төрайымы Ленка Либусованың кездесуі өткен болатын. Тараптар зияткерлік сайысты ұйымдастыру мәселелерін, сондай-ақ қазақстандық білім беруді дамыту перспективаларын талқылады.
Жалпы, 2023 жылдың қорытындысы бойынша қазақстандық оқушылар халықаралық олимпиадаларда 580 медальға ие болды, оның ішінде 23 медальді ең беделді жеті әлемдік олимпиадада жеңіп алған: IMO, IPhO, IBO, IOL, IСhO, IGeO, IOI. Оларға бір жолғы ақшалай сыйлық берілді: алтын медаль алғандарға – 1500 АЕК, күміс үшін – 1000 АЕК, қола үшін – 500 АЕК, сондай-ақ оларды дайындаған педагогтерге базалық жалақының 8,5-тен 26,5 еселенген мөлшерінде сыйақы төленді.
