Шардара аудандық білім бөлімінінің әдістемелік кабинеттің іс-жоспарына сәйкес, бөлім әдіскері Г.Мырзабекованың ұйымдастыруымен Б.Соқпақбаев атындағы жалпы білім беретін мектепте «Оқу мен оқытудағы іс-әрекетті зерттеу» тақырыбында аймақтық семинар өткізілді.
Іс-шараның мақсаты сабақты зерттеу нәтижесінде бірлескен әрекетті тиімді ұйымдастыра отырып, оқушылар арасындағы қарым-қатынасты жақсарту арқылы білім сапасының артуына ықпал ету болды. Семинарға серіктес мектептер: №7 жалпы білім беретін бастауыш мектеп және Қ.Сағырбайұлы атындағы жалпы білім беретін мектептің жаратылыстану, гуманитарлық бағыттағы пәндерден сабақ беретін мұғалімдері қатысты.
Семинар барысында алгебра пәнінен 9 «Ә» сынып оқушыларына С.Демеуова «Тригонометриялық тепе-теңдіктер», химия пәнінен 9 «А» сынып оқушыларына А.Асқарова «Күкірттің қосылыстары», география пәнінен 9«Б» сынып оқушыларына «Қазақстанның ірі физикалық-географиялық аудандары» атты тақырыптарда ашық сабақтар өтсе, қазақ тілі мен әдебиеті пәні мұғалімі Г.Арынова «Функционалдық сауаттылықты арттыру» тақырыбында мұғалімдермен коучинг жүргізді.
Сабаққа қатысқан барлық ұстаздарға серіктестік жұмысын арттырып, жан-жақты іздену арқылы жұмыс жасауға шақырды.
Айта кетейік, бүгінде Шардара ауданында 31 мемлекеттік мектеп бар. Онда 19 мыңнан астам оқушы білім алуда. 41 балабақшада (17 мемлекеттік, 23 жеке меншік, 1 шағын орталық) 4636 бүлдіршін тәрбиеленуде. Мектептердің информатика кабинеттері 3837 компьютермен жабдықталған, нәтижесінде 1 компьютерді пайдаланатын оқушы саны 5,47 бірлікке жетті. Аудан мектептерінің телефонмен байланысы және интернет желісін пайдалану 31 мектептің барлығында орнатылған.Өткен жылы «Шардара мектеп-лицейіне» облыстық бюджеттен 254,9 млн теңге қаржы қаралып, ғимарат күрделі жөндеуден өтті.30 мектепке 83,7 млн теңге қаржы қаралып, ағымдағы жөндеу жұмыстары жүргізілді.Сонымен қатар 2023-2025 жылдар аралығында «Жайлы мектеп» жобасы аясында ауданда 2 мектептің құрылысын жүргізу қолға алынды. Жобаға сәйкес, 1500 оқушы заман талабына сай мектеппен қамтылады (Шардара қаласындағы 4-ші мөлтек ауданына 1200 орындық, Өтеғұл мөлтек ауданына 300 орындық) деп күтілуде. Қазіргі таңда аталған мектептерге жер телімдерінің мемлекеттік актілері және тиісті техникалық шартары алынып рәсімделді.
