Мемлекет басшысының арнайы тапсырмасымен үш ауысымды, апатты, ескі мектептер мәселесін шешу бағытында «Жайлы мектеп» пилоттық ұлттық жобасы әзірленді. Жоба аясында заманауи мектеп ғимаратының құрылысы жүргізіліп, ауыл және қала мектептерінің айырмашылығын едәуір азайту көзделген. Осы жоба аясында Түркістан облысында 63 мектеп салу жоспарланған.
Бүгінде облыста «Жайлы мектеп» пилоттық ұлттық жобасы аясында білім ошақтарының құрылысы қарқынды жүргізіліп жатыр. Соның ішінде – Сарыағаш ауданында осы бағытта 10 мектеп салу жоспарланған. Бүгін облыс әкімі Дархан Сатыбалды жұмыс сапары барысында «Телемұнара» ықшамауданындағы 900 орындық білім ошағының құрылыс алаңында болды. Мердігерлермен кездесіп, мерзімінде аяқтауды тапсырды. Нақты міндеттер жүктеп, білім сапасын көтеру, мектеп тапшылығын жою – маңызды іс екенін айтты.
Қазіргі уақытта құрылыс нысанында 80 адам жұмыс істеп жатыр. Жертөле қабырғалары құйылып, жабын қабаттарының темір бетон құю жұмыстары жүргізілуде. Кірпіш қалау жұмыстары жүргізілуде.
Сарыағаш ауданында өзге де білім нысандары салынып жатыр. Б.Оспанов көшесінің бойынан А.Сүлейменов атындағы 300 орындық мектептің құрылысы басталып кеткен. Сонымен қатар Дербісек, Жаскешу елді мекендерінде аталған жоба аясында мектеп ғимараттарының құрылыс жұмыстары жүргізілуде. Биыл «Самал-3» мөлтек ауданынан 1500 орындық мектептің құрылыс жұмыстарын бастау жоспарланып отыр.
