Соңғы қоңырауға бір күн қалғанда барлық білім шаңырақтарында «Білімім – Отаныма» атты жалпыреспубликалық бірыңғай сынып сағаты өтеді. Бұл «Біртұтас тәрбие» бағдарламасы аясында қабылданған іс-шара. Осы бағытта бүгін Келес ауданы білім беру бөліміне қарасты 63 білім беретін мектептерде 2023-2024 оқу жылының қорытындысына арналған «Білімім – Отаныма» жалпыреспубликалық бірыңғай сынып сағаттары өтті. Сынып сағатына 30 мыңға жуық оқушы қатысты. Келес ауданы білім бөлімі басшысының міндетін атқарушы Анафия Арыстанбайқызы №2 Ө.Жәнібеков атындағы мектеп-гимназиясында өткен сынып сағаттарына қатысып, түлектерге жылы лебізін білдірді.
Жалпы бүгінгі тәрбие сағаттарының мақсаты – балаларды ұстаздарды құрметтеуге, білім ұясына қамқор болуға, білім алуға құштар болуға, жыл бойы алған білімінің нәтижесін қорытындылай білуге тәрбиелеу. Іс-шара Әнұранмен басталып, ҚР Оқу-ағарту министрінің құттықтау сөзі жазылған видеоролик оқушылардың назарына ұсынылды. Аталған шараға ата-аналар да қатысты. Сонымен қатар жыл бойы үздік болған оқушылар марапатталды. 9, 11-сыныптың түлектері болса «Мен. Мектеп. Ұстаз» тақырыбында балалық шақтан болашаққа қадамы туралы эссе жазды.
