Түркістан облысында өзге ұлт өкілдерінің 74 пайызы қазақ тілін меңгерген

Облыс әкімінің 2023 жылғы 16 қарашадағы №248 қаулысымен «Түркістан облысында Қазақстан Республикасында тіл саясатын дамытудың 2023-2029 жылдарға арналған тұжырымдамасын іске асырудағы іс-қимыл жоспары» бекітілген болатын. Бүгінде жоспарға сәйкес мемлекеттік тілдің рөлін күшейту бойынша мемлекеттік тілді меңгерген тұрғындардың үлесі өткен жылдың қорытындысы бойынша 91,5% құрады. Ал биыл 92% пайызға жеткізу жоспарланып отыр. Бүгінгі таңда өңірдегі өзге ұлт өкілдерінің 74 пайызы қазақ тілінде сөйлесе алады.
Биылғы І тоқсанында тіл оқыту орталықтарында 1868 адам қазақ тілін оқыған. Оның 607-сі өзге этностар. Жалпы облыста 17 тіл оқыту орталығы жұмыс істейді. Орталықта ересек тұрғындарға үш тіл, атап айтсақ, қазақ, орыс, ағылшын тілдері үйретіледі. Орталықтарда 51 оқытушы жұмыс істейді. 2023 жылда қазақ тілін 2754 адам, орыс тілін 1786, ағылшын тілін 1488 адам оқыған.