Облыста «Жайлы мектепке» қабылданатын педагогикалық құрамның алғашқы легі біліктілік арттыруды бастады. Олар «Жайлы мектеп» Ұлттық жобасы аясында алғашқы кезекте құрылыс нысанының жойылуына байланысты толық құрамда жаңа жайлы мектепке көшірілетін 8 мектептегі 41 мектептің басшылық құрамы мен мұғалімдері. Ұстаздарға Абай атындағы Қазақ Ұлттық педагогикалық университетінің профессорлар өз бағыттары бойынша дәріс оқыды. Бұл бастама Түркістан облысының әкімі Дархан Сатыбалдының арнайы ұсынысымен басталып, өткен жылдың 8 желтоқсанында Алматы қаласындағы Абай атындағы Қазақ Ұлттық педагогикалық университетінің ректоры Тілеп Болат Анапияұлы мен Түркістан облысы әкімінің орынбасары Бейсенбай Тәжібаевтың өзара түсіністік туралы меморандумға қол қойған еді.
Меморандум аясында Түркістан облысында 2023-2025 жылдары аралығында «Жайлы мектеп» Ұлттық жобасы аясында салынатын мектептерге қабылданатын педагогикалық қызметкерлер аталған университетте біліктілігін арттырады. Бұл мәселені шешу мақсатында жалпы 1904 білім қызметкерлері білімін жетілдіретін болады. Осы мақсатта Түркістан облысының білім саласының қызметкерлері мен Абай атындағы Қазақ Ұлттық педагогикалық университетінің профессорлар құрамы басқосты.
Курс барысында мектеп басшылары мен орынбасарлары, бастауыш сынып мұғалімдері, гуманитарлық бағыттағы және жаратылыстану бағытындағы білім қызметкерлеріне арнайы 4 топ жұмыс жасап, профессорлар құрамы лекция оқыды.
Айта кетейік, «Жайлы мектеп» Ұлттық пилоттық жобасын іске асыру шеңберінде 2023-2025 жылдары Түркістан облысында 63 мектептің құрылысын салу жоспарланған. 2024 жылы – 29, 2025 жылы – 34 мектептің құрылысы аяқталады деп көзделуде. Келешекте онда 49 мың бала білім алады.
Мемлекет басшысының бастамасы негізінде қолға алынған заманауи, жайлы мектептердің салынуы өңірдегі үш ауысыммен оқытатын және апатты мектептер проблемалары шешілмек.
