Түркістан облысы, Кентау қаласының оқушысы Ұлттық бірыңғай тестілеуден жоғары 138 баллды жинады. Бұл көрсеткіш әзірге, еліміз бойынша ең жоғары нәтиже!
Қожанов Айдос Хайруллаұлы – 10 жыл бойы № 16 Юрий Гагарин атындағы мектеп-лицейінде білім алған. Ал 11 сыныпты «Грант» жекеменшік мектебінде тәмамдаған.
Кентаулық түлек Айдос болашақта математика пәнінің мұғалім болғысы келеді. Қазір осы бағытта көп оқып, ізденіп жүр. Мәселен, қалалық, облыстық жарыстарға да қатысып, жүлделі орындарды иеленген. Ұстаздары мен ата-анасы да дарынды оқушының болашағынан үлкен үміт күтіп, мақтан етеді.
Мектеп директорының айтуынша, Айдос «Жыл бойы мектептің байқау сынақтарында І орынды бермей келген.
Айта кетсек, Түркістан облысында 2023-2024 оқу жылында Ұлттық бірыңғай тестілеуге қатысуға 27 340 оқушы өтінім білдірген. Жалпы облыста 32 306 оқушы 11-сыныпты тәмамдаған. Оның 1 727-і — «Алтын белгі» белгіге, 2 466 оқушы — «Үздік аттестатқа» үміткер.
Негізгі ҰБТ басталғаннан бері 71 мыңнан астам адам тест тапсырды. Оның ішінде талапкерлердің 71% – ы қазақ тілінде, 29% – ы орыс тілінде, 84 адам ағылшын тілінде тестілеуден өтті.
Естеріңізге сала кетсек, күн сайын ҰБТ екі лекте өткізіледі. Статистикаға сәйкес, таңғы лекте ҰБТ тапсырушылардың орташа балы түстен кейінгі лекте тапсыратын талапкерлерден жоғары. Қазіргі уақытта айырмашылық 5 балды құрайды: сәйкесінше 69 және 64 балл.
Айта кетейік, ерекше білім беру қажеттіліктері бар оқуға түсушілер үшін қолайлы жағдай жасаудың арқасында ҰБТ-ға екі аптаның ішінде 266 талапкер қатысты. Бүгінгі таңда 126 ереже бұзушылық анықталды. Оның ішінде 94 талапкер смартфон, шпаргалка және басқа да тыйым салынған заттарды алып өту әрекеті салдарынан тест тапсыру мүмкіндігінен айырылды. Тестілеу кезінде ережелерді бұзғаны үшін аудиториядан 27 адам шығарылып, олардың нәтижелері жойылды. Бейнежазбаларды тексеруден соң ереже бұзған 5 адамның нәтижесі жойылды. Бөгде тұлғалар анықталған жоқ.
Айта кетсек, 2024 жылғы ҰБТ аяқталғаннан кейін күнтізбелік жылдың 31 қазанына дейін тестілеудің бейнежазбаларына талдау жүргізіледі. Тыйым салынған заттарды пайдалану немесеережелерді бұзу фактілері анықталған жағдайда түсушінің ҰБТ нәтижелері жойылады.
