Ордабасы ауданындағы 64 жалпы білім беру ұйымдарында 2024 жылдың 30 мамыр күні «Қазақстан балалары – жазды қуанышқа толтырайық!» атты тақырыбында мектеп жанындағы жазғы лагердің ашылу салтанаты өткізілді. 2024 жылдың 27 мамыр мен 28 маусым аралығында аралығында 1-4-сынып оқушылары үшін, 64 жалпы орта мектепте, жалпы 13188 оқушы мектеп жанындағы лагерлерде демалдырылады. Асханасы талапқай сай 30 мектепте ата-аналар мен демеушілердің есебінен бір мезгіл тамақ ұйымдастырылып, 5000 оқушы қамтылады.
Мектеп жанындағы күндік лагерлердің негізгі мақсаты – лагерге келген әрбір оқушыны алдымен жақсылыққа, адамгершілікке, ұйымшылдыққа тәрбиелей отырып, оқушылардың жазғы демалыс уақытын тиімді пайдалана білуге үйрету. Балалардың жаз мезгіліндегі демалысын, тиімді әрі мағыналы өткізуге жағдайлар жасау, қауіпсіздік ережелерін үйрете отырып салауатты өмір салтын қалыптастыру, шығармашылық қабілеттерін дамыту әрі Отансүйгіштік – патриоттық сезімін арттыру.
Ашылуына ардагерлер, қоғамдық ұйым өкілдері, аудандық мәслихат депутаттары, қала сыртындағы лагерлердің директорлары мен ата-аналар қатысты.
Салтанатты жиын қонақтары ашылу рәсіміне дейін балалардың қыштан түрлі бұйымдар жасау мастер-класстарын, мектептен тыс мекемелердің бүлдіршіндері салып жатқан суреттерді тамашалап, қолөнер көрмелерімен танысты.Бүлдіршіндердің әуелеткен әнімен, қобызшылардың күмбірлеген күйімен жалғасын тапқан жиында ата-аналар алғысын білдірді.
Салтанатты жиын соңында қонақтар орталықпен танысты.
Сонымен қатар, 1 маусым – Балаларды қорғау күніне орай, «Қазақстан халқына» қоғамдық қорының «QH Жаздық жолдама – 2024» қайырымдылық жобасы бойынша Ордабасы ауданынан 5-8-сынып аралығынан 50 оқушы, Шымкент қаласы, Маятас ауылында орналасқан «Гавая» жазғы сауықтыру лагеріне демалуға жіберілді.
«Қазақстан халқына» қоғамдық қоры ұйымдастырып отырған қайырымдылық шарасы оқуда үздік көрсеткіштерге ие (үлгерімі және пәндік олимпиадаларға, пікірталастарға қатысуы) және мектептің қоғамдық өміріне белсенді қатысатын 5-8-сынып оқушыларын қолдауға және ынталандыруға бағытталған. Мақсаты – балалар мен жасөспірімдердің өз денсаулықтарына жауапкершілігін нығайту, салауатты өмір дағдыларын қалыптастыру, шығармашылық қабілетін дамыту. Ауылдық жерлердегі оқушылардың жазғы лагерьлерде білім алуы мен мәдени дамуын қамтамасыз ету.
