Отбасы – қоғамның ең маңызды діңгегі. Тәрбиенің түп-тамыры отбасынан басталады десек, осындай татулықты ту етіп, тамыры тереңге жайылған білімді, тәрбиелі Абуталиповтар әулетінде «Алтын белгі» иелері мен оқу озаттары өсіп келеді.
Арыс қаласының білім бөліміне қарасты М.Шаханов атындағы жалпы білім беретін мектебінің ұлағатты ұстаздарынан сапалы білім алып, үлгілі тәртіптерімен ерекшеленіп, Абуталиповтар отбасының ұл-қыздары бірнеше аудандық, облыстық, республикалық жарыстардың жеңімпаздары атанды. Әкесі Ашимов Султан Абуталипович елге сыйлы бірегей азамат және осы аталған мектепте дене шынықтыру пәнінің мұғалімі, анасы Бекбосинова Лаила Усеновна информатика пәнінің мұғалімі.
Отбасының тұңғышы Абуталип Даулет Сұлтанұлы мектепті үздікке аяқтап, «Алтын белгі» иегері атанды. Қазіргі таңда Алматы қаласы Абай атындағы Мемлекеттік университетінің 3-курс студенті жоғарғы стипендия иегері атанып, білімін жалғастыруда.
Абуталип Аружан Сұлтанқызы 9-сынып оқушысы, оқу үздігі, «Үздік куәлікке» үміткер. Абуталип Айғаным Сұлтанқызы 5-сынып оқушысы оқу үздігі, Абуталип Айбар Сұлтанұлы 4-сынып оқушысы, оқу үздігі.
Өз кезегінде бір отбасын мүлтіксіз басқарып, отбасы мүшелеріне адами құндылықтардың дәнін еге білген кісі аз талпыныспен одан да маңызды істерде жетістікке жете алады. Алдағы уақытта бұл отбасынан зор үміт күтеміз.
Айта кетейік, Арыс қаласы бойынша 2023-2024 оқу жылында 1-11-сыныптарда 18435 оқушы оқу жылын аяқтап отыр. Бітіруші 11-сынып оқушыларының саны – 1120. Оның ішінде, «Алтын белгіге» – 55 оқушы, «Үздік аттестатқа» – 114 оқушы үміткер.
Жалпы білім ошағының табалдырығын аттаған балалардың барлығы талантты, дарынды. Тек олардың бойындағы қабілетін ашып, жан-жақты дамуына жол сілтеп, шығармашылық қатынасын, азаматтық белсенділігін қалыптастырудың маңызы зор. Бұл бағыттағы жүйелі жүргізіліп жатқан жұмыстардың нәтижесінде шәкірттеріміз түрлі деңгейдегі жарыстар мен байқауларда, олимпиадаларда топ жарып, мектептің мәртебесін биіктетіп келеді
