Азық-түлік тауарларының бағасын тұрақтандыру мақсатында Түркістан қаласында кезекті жәрмеңке өтті. Тұрғындар өнімдерді делдалсыз, тікелей өндірушіден сатып алды. Шараны «Түркістан әлеуметтік-кәсіпкерлік корпорациясы» АҚ ұйымдастырған.
Кезекті жәрмеңке «Отырар» мөлтек ауданындағы көпқабатты тұрғын үйлердің маңында ұйымдастырылды. Онда әлеуметтік маңызы бар 19 түрлі тауар қойылып, арнайы бекітілген бағада ұсынылды.
Жұмыртқа данасы — 40 теңге, ас тұзы — 45 теңге, нан бөлкесі — 70 теңге, қырыққабат — 55 теңге, пияз — 77 теңге, ал картоп пен сәбіз — 100 теңгеден саудаланды. Сондай-ақ күріш, шекер, қарақұмық, бірінші сұрыпты бидай ұны, күнбағыс майы да арзан бағада сатылды. Тұтынушылар үшін ет және сүт өнімдері де нарықтағы бағадан 30-40%-ға төмендетілді. Азаматтар игілікті бастама үшін ризашылығын білдірді.
