«Бірлікте болғаның – бақытты өмір сүргенің». Осы ұран аясында Түркістан облысында қоғамдық келісім мен этносаралық татулықты нығайту бағытында ақпараттық-насихаттық жұмыстар жүйелі түрде жалғасуда.
Түркістан облыстық қоғамдық даму басқармасы «Қоғамдық келісім» КММ-нің ұйымдастыруымен өңір тұрғындары арасында кезекті кездесу және фокус-топтық зерттеу жұмыстары Кентау қаласы мен Қарнақ ауылында өтті.
Іс-шараға «Қоғамдық келісім» КММ-нің этносаралық қатынастар саласы мониторингі және ақпараттық-насихаттық жұмыстарды ұйымдастыру бөлімінің басшысы Хамит Исақов, Кентау қаласы әкімінің орынбасары Ақнұр Байболова, «Қоғамдық келісім» КММ-нің Кентау қалалық филиалының басшысы Бақытжан Әшірбаев, Түркістан облысы дін істері басқармасының «Дін мәселелерін зерттеу орталығы» КММ-нің теолог маманы Қайсар Мырзабай, сондай-ақ этномәдени бірлестік төрағалары, ҚХА жанындағы құрылым мүшелері, ауыл билері мен зиялы қауым өкілдері және жастар қатысты.
Кездесу аясында «Ауызбіршілік – алтыннан да қымбат», «Қоғамдағы этносаяси ахуал және этнос өкілдерінің қазақстандық қоғамға интеграциялануы» тақырыптары кеңінен қозғалды. Қатысушылар қоғамдағы татулық пен өзара түсіністіктің маңыздылығына тоқталып, ел ішіндегі бейбітшілік пен тұрақтылықты сақтау – әр азаматтың борышы екенін атап өтті.
Сонымен қатар фокус-топтық зерттеу жұмыстары арқылы тұрғындардың пікірлері тыңдалып, этносаралық қатынастар жайлы ашық диалог орнады. Жиын барысында жергілікті халық көкейлерінде жүрген сұрақтарын қойып, сала мамандарынан нақты жауаптар алды.
Бұл бағыттағы жұмыстар өңірдегі қоғамдық келісімді нығайтуға, әртүрлі этнос өкілдерінің біртұтас қазақстандық қоғамға табысты бейімделуіне және ел бірлігін сақтау ісіне өз үлесін қосуды мақсат етеді.
