Түркістан облысында инфрақұрылымды дамыту жұмыстары жалғасып, Жетісай ауданына жаңа жобалар енгізілуде. Облыс әкімі Нұралхан Көшеровтің тапсырмасы бойынша аймақта электр қуатының сапасын арттыру мақсатында ауқымды шаралар қолға алынған. Бұл бағытта Жетісай қаласында жаңа қосалқы электр станциясының құрылысы қарқынды түрде жүргізілуде.
Қазіргі уақытта «Vek-Story-Com» ЖШС мердігер мекемесі жүзеге асырып жатқан жобаның сметалық құны 1 300 215 мың теңгені құрайды. Қуаттылығы 110/35/10 кВ болатын станция өткен жылдың қыркүйегінде басталып, биыл толық пайдалануға берілуі жоспарлануда. Құрылыс жұмыстарының 90 пайыздан астамы аяқталды.
Станция іске қосылғаннан кейін Жетісай қаласының 12 көп қабатты үйі, яғни, 440 пәтерлі 1842 абонент тұрақты әрі сапалы электр қуатымен қамтамасыз етіледі. Сондай-ақ, бұл жоба аясында 15-ке тарта азамат тұрақты жұмыс орнымен қамтылатын болады.
Бұл жобаның жүзеге асуы, тұрғындардың өмір сүру сапасын жақсартуға, сондай-ақ, аймақтағы инфрақұрылымның тиімділігін арттыруға үлкен септігін тигізеді.



