Жуырда Қазақстан Республикасының Президенті Қасым-Жомарт Тоқаев қол қойған заңға сәйкес, Кентау қаласы мен оған қарасты ауылдар экологиялық аймақ қатарына енгізілді. 1 шілдеден бастап заң күшіне енді, осылайша қала мәртебесі ресми түрде өзгертілді. Бұл – жылдар бойы көтеріліп келген маңызды мәселенің нақты шешімі.
ҚР Парламенті Сенатының депутаты Әли Бектаев Кентауға жасаған сапары барысында тұрғындармен кездесіп, осы жағымды жаңалықты ресми түрде хабарлады. Кездесуге қала әкімі Жандос Тасов, қалалық маслихат депутаттары, зиялы қауым өкілдері мен тұрғындар қатысты.
Экологиялық аймақ мәртебесін алған Кентау қаласы мемлекет тарапынан қосымша қолдаулар мен жеңілдіктерге ие болады. Бұл қала үшін маңызды қадам болып табылады, себебі ол әрі қарай дамуына, экологиялық жағдайын жақсартуға және тұрғындарының өмір сапасын арттыруға серпін береді.
Бұл тарихи шешім қала тұрғындарының ұзақ жылдар бойы көтеріп келген талабын ескеріп, олардың үміті мен табанды еңбегінің нәтижесі болып табылады. Экологиялық аймақ мәртебесін алу арқылы Кентау жаңа мүмкіндіктерге жол ашады.



