Мемлекет басшысы Қасым-Жомарт Тоқаевтың тапсырмасымен елімізде басталған «Таза Қазақстан» бағдарламасы аясында Түркістан облысы Төлеби ауданында сенбілік ұйымдастырылды. Әлем чемпионы, халықаралық деңгейде танымал қазақ MMA файтері Арман Оспанов тазалық шарасына қатысып, тұрғындарға экологиялық мәдениет пен тазалықты сақтау маңыздығын жеткізді.
Арман Оспанов — әскери самбодан үш дүркін әлем чемпионы, жауынгерлік самбодан үш дүркін әлем кубогының жеңімпазы және бразилиялық джиу-джитсудан екі дүркін Азия чемпионы. Сонымен қатар, ол ережесіз жекпе-жектерден халықаралық турнирлердің жеңімпазы, спорттағы көптеген жетістіктері үшін ҚР еңбек сіңірген спорт шебері атағын алған спортшы. Спортшының қоғамдық шараларға белсене қатысуы жастар үшін үлкен үлгі болып табылады.
Тазалық шарасына Төлеби ауданының әкімі Еркеғали Әлімқұлов бастаған 100-ден астам мемлекеттік қызметкер мен жергілікті тұрғындар қатысты. Біркөлік аймағында ұйымдастырылған шара барысында 12 шақырым аумақ қоқыстан тазартылып, 6 арнайы техника көмегімен қалдықтар белгіленген орынға жеткізілді.
Сенбілік барысында демалыс аумағындағы қоқыстар жиналып, өзен жағалаулары мен жол жиегі тазартылды. Әлем чемпионы Арман Оспанов пен аудан әкімі Еркеғали Әлімқұлов табиғаттың баршаға ортақ байлық екенін атап өтіп, тұрғындарды экологиялық мәдениетті арттыруға және тазалықты сақтауға шақырды.
Бұл шара тұрғындарға табиғатқа қамқорлықпен қарау, өз аумақтарын таза ұстау қажеттігін тағы да еске салып, осындай бастамалардың маңыздылығын арттырады.
