Саф ауасы мен көркем табиғатымен әйгілі Төлеби ауданына жаз мезгілінде демалушылар легі артқан сайын, экологиялық ахуалға жауапсыз қарым‑қатынастар да байқалуда. Кейбір келушілер өзен жағалауында, жол бойларында қоқыс қалдырып, экожүйеге зиянын тигізуде.
Мемлекет басшысы Қасым‑Жомарт Тоқаев 2024 жылғы Қазақстан халқына Жолдауында ел болып қолға алған «Таза Қазақстан» республикалық экологиялық акциясын жариялаған еді. Бұл акция ауыл‑ауылдарда сенбілік өткізу, көгалдандыру, қоқыс жинау сияқты шараларды тұрақты түрде жүзеге асыруды көздейді
Осы бағдарламаның аясында және аудан әкімінің бастамасымен Қасқасу ауылындағы Сайрамсу өзенінің бойына шұғыл сенбілік ұйымдастырылды. Іс‑шараға 200‑ге жуық мемлекеттік қызметкер қатысып, 7 шақырым бойындағы автожол және өзен жағасы тазартылды. Қорытындысында 9 тонна қоқыс жиналып, арнайы техника арқылы полигонға шығарылды.
Аудан әкімдігі тұрғындарды, туристерді және қонақтарды табиғаттың тазалығын сақтау үшін экологиялық мәдениетті дамытуға шақырады. Сонымен қатар, белгіленбеген жерлерге қоқыс тастағандарға ҚР «Әкімшілік құқық бұзушылық туралы» Кодексінің 505-бабы мен 432-2-бабына сәйкес айыппұл салынатыны ескертті.
«Таза табиғат – таза келешек. Табиғатты аялау – азаматтық парыз» деген ұран төбе көрсетіп, Төлеби азаматтары мен қонақтары жауапкершілікке шақырылады.
