Сауран ауданында «Табиғатқа қамқорлық жасау» күніне орай экологиялық акция ұйымдастырылды. Іс-шара аудан әкімдігі мен аудандық полиция бөлімінің бірлескен бастамасымен өтті. Оранғай ауылдық округі аумағында өткен сенбілікке 100-ге жуық адам қатысып, 7 арнайы техника жұмылдырылды.
Тазалық жұмыстары барысында Қарашық өзенінің 7 шақырымдық жағалауы тұрмыстық қалдықтардан толықтай тазартылды. Сенбілікке мемлекеттік қызметшілермен қатар, жергілікті тұрғындар, жастар және еңбек ұжымдары белсенді атсалысты.
Шараға аудан әкімінің орынбасары Әлімжан Сихымбай арнайы қатысып, ұйымдастырушылар мен қатысушыларға алғысын білдірді. Ол өз сөзінде:
— Мемлекет басшысы Қасым-Жомарт Тоқаев өз Жолдауларында қоршаған ортаны қорғау және экологиялық мәдениетті қалыптастыру мәселелеріне ерекше назар аударып келеді. Бүгінгі бастама – осы бағыттағы нақты іс-шаралардың бірі. Табиғатты аялау – болашаққа қамқорлық. Осындай игі істер ел бірлігі мен азаматтық жауапкершіліктің айқын көрінісі, — деді.
Айта кетейік, бұл акция «Заң мен тәртіп апталығы» аясында қолға алынған жоспарлы шаралардың бірі болып табылады. Сауран ауданында қоршаған ортаны қорғауға бағытталған жұмыстар жүйелі түрде жалғасын табуда.



