Кентау қаласында жастардың белсенділігін арттырып, олардың қоғамдық пайдалы еңбекке араласуын мақсат еткен «Жасыл ел» еңбек жасағы биылғы маусым-шілде айларындағы жұмысын бастады. Жасыл белсенділердің кезекті еңбек маусымы ресми түрде ашылып, алғашқы топ жұмысқа кірісті.
Биылғы маусымда NEET санатындағы (яғни жұмыс істемейтін, оқымайтын және оқуға қатыспайтын) жастардың үлесін азайту мақсатында 60 жас еңбекпен қамтылмақ. Жобаның аясында қала жастары көше тазалығы мен көгалдандыру, ағаш отырғызу, саябақтарды күтіп-баптау және қаланы абаттандыру жұмыстарымен айналысады.
«Жасыл ел» жобасы жастардың бос уақытын тиімді пайдалануға мүмкіндік беріп қана қоймай, олардың еңбекке деген құрметін арттырып, экологиялық мәдениетті қалыптастыруға, құқықбұзушылық пен зиянды әдеттердің алдын алуға бағытталған. Сонымен қатар, жас ұрпақ арасында патриоттық рух пен өзара сыйластықты нығайтуды көздейді.
Кентау қаласы әкімдігі мен тиісті құрылымдар жастардың белсенділігіне қолдау білдіре отырып, осындай игі жобалардың жүйелі түрде жалғасуына ықпал етпек.
