Түркістан облысындағы Шардара су қоймасы маңындағы туристік аймақтарда жазғы маусымға орай санитарлық тазалық пен қауіпсіздік шаралары күшейтіліп жатыр. Бұл жұмыстар Мемлекет басшысы Қасым-Жомарт Тоқаевтың туризмді дамыту және инфрақұрылымды жетілдіру жөніндегі тапсырмасына сәйкес жүзеге асырылып келеді.
Осыған орай облыс әкімінің бірінші орынбасары Зұлпыхар Жолдасов жағажайлар мен демалыс орындарында атқарылып жатқан жұмыстармен танысып, туристерге көрсетілетін қызмет сапасын және инфрақұрылым нысандарының жағдайын тексерді.
Айта кетейік, жуырда облыс әкімі Нұралхан Көшеров жағажайларда тәртіп пен қауіпсіздікті күшейту туралы нақты тапсырмалар берген болатын. Қазіргі таңда осы бағытта нақты шаралар қолға алынып, туристік нысандарға жауапты мамандар мен кәсіпкерлерге ескертулер жасалып, бірқатар міндеттер жүктелді.
Атап айтқанда, жағажай маңында құтқарушылар саны арттырылып, суға тым жақын орналасқан сәкілер жағалаудан алшақтатылуда. Сондай-ақ көлік қозғалысын реттеу және автотұрақтарды жүйелеу бойынша тиісті жұмыстар жүргізілуде.
Қазіргі таңда туристік нысандарға мониторинг жұмыстары тұрақты түрде жүргізілуде. Талаптарды орындамаған тұлғаларға заң аясында шара қолданылып жатыр.
Шардара аймағындағы демалыс орындары өңірдегі туризм саласының дамуына серпін беруде. Осы бағыттағы жұмыстар алдағы уақытта да жалғасын табады.



