Хантағы ауылдық округіне қарасты Біресек елді мекенінде діни экстремизмнің алдын алу мақсатында ақпараттық-түсіндіру жұмыстары жүргізілді. Бұл шара – тұрғындардың діни сауаттылығын арттыру, жат ағымдардың ықпалынан сақтандыру бағытындағы кешенді жұмыстардың бір бөлігі.
Кездесуді «Кентау қалалық Руханият орталығы» коммуналдық мемлекеттік мекемесі ұйымдастырып, оған орталықтың теолог маманы Ұлан Құлтай және жергілікті тұрғындар қатысты.
Жиын барысында теолог маман қоғамда жиі кездесіп отырған деструктивті діни ағымдардың идеологиялық белгілері, олардың адамдардың санасын улаудағы тәсілдері, сонымен қатар жастарды арбау жолдары жайында кеңінен сөз қозғады. Ұ.Құлтай дін атын жамылған теріс идеологиялардан сақ болуға, ресми діни көзқарасты ұстануға және діни ақпарат көздерін таңдау барысында сақтық танытуға шақырды.
– Қазіргі уақытта интернет пен әлеуметтік желілер арқылы тарап жатқан діни мазмұндағы ақпараттардың барлығы бірдей дұрыс бола бермейді. Сондықтан әрбір адам діни мәселеде сауатты болуы тиіс. Қандай да бір сұрақ туындаса, ресми органдар мен мамандардан кеңес алғаны жөн, – деді теолог маман.
Кездесу соңында қатысушыларға арнайы дайындалған ақпараттық үнпарақшалар таратылып, теолог тарапынан қойылған сауалдарға жауап берілді. Ауыл тұрғындары мұндай шаралардың маңызын атап өтіп, алдағы уақытта да осындай кездесулер жиі ұйымдастырылса деген ұсыныстарын жеткізді.
Айта кетейік, Кентау қалалық «Руханият» орталығы тарапынан осындай ақпараттық іс-шаралар қала мен ауылдық округтерде тұрақты түрде өткізіліп келеді. Мақсат – халықтың діни сауаттылығын арттыру арқылы қоғамдағы рухани тұрақтылықты нығайту.
