Қарнақ және Жүйнек ауылдары арасында «Жастар және бейбітшілік мәдениеті» тақырыбында тұрғындармен кездесу өтті. Шараның басты мақсаты – этносаралық келісімді нығайту, жас ұрпақты ұлттық құндылықтарға баулу, жастар арасындағы құқықбұзушылықтың алдын алу және ата-аналардың тәрбие беру ісіндегі жауапкершілігін арттыру.
Жиынды Түркістан облыстық қоғамдық даму басқармасының «Қоғамдық келісім» КММ-нің Кентау қалалық және Сауран аудандық филиалдары ұйымдастырды. Кездесуге Кентау қалалық ҚХА жанындағы ақсақалдар кеңесі төрағасының орынбасары, Қарнақ ауылының ақсақалдар кеңесінің төрағасы, ауылдың бас имамы, сондай-ақ Кентау қалалық және Сауран аудандық өзбек этномәдени бірлестіктерінің төрағалары, көше билері мен белсенді тұрғындар қатысты.
Кездесу барысында сөз алғандар этносаралық татулық пен қоғамдық келісім – ел болашағы үшін аса маңызды фактор екенін атап өтті. Олар бейбітшілікті сақтау, тұрақтылықты нығайту – әрбір азаматтың парызы екенін, ал ұрпақ тәрбиесінде отбасы, мектеп және қоғамның рөлі өзара байланысты екенін жеткізді.
Жиынға қатысушылар жастардың тәрбиесі мен құқықтық санасын қалыптастыруда жүйелі жұмыс жүргізу қажеттігіне тоқталып, этносаралық қарым-қатынасты нығайту бағытында жергілікті деңгейде атқарылып жатқан жұмыстармен бөлісті.
Бұл сияқты кездесулер ел ішіндегі бірлікті бекемдеп, жас ұрпақты бейбітшілік пен толеранттылық рухында тәрбиелеуге сеп болады. Ұйымдастырушылар мұндай іс-шаралар алдағы уақытта да жалғасын табатынын атап өтті.
