Қарнақ ауылдық округіне қарасты Шаш-төбе елді мекенінде діни экстремизм мен радикалды ағымдардың алдын алу мақсатында тұрғындармен түсіндіру кездесуі өтті. Бұл шара – өңірде жүргізіліп жатқан рухани ағарту жұмыстарының бір бөлігі ретінде ұйымдастырылды.
Кездесуді «Кентау қалалық Руханият орталығы» коммуналдық мемлекеттік мекемесі ұйымдастырды. Шараға орталықтың инспекторы Бейсен Самбетов пен теолог маман Ұлан Құлтай және ауыл тұрғындары қатысты.
Жиын барысында теолог маман дін атын жамылып, қоғамда алауыздық тудыруға бағытталған жалған діни ағымдардың идеологиясы, олардың белгілері мен таралу тәсілдері туралы кеңінен әңгімелеп берді. Ол сондай-ақ мұндай ұйымдардан сақтану үшін әрбір азаматтың діни сауаттылығы жоғары болуы қажет екенін ерекше атап өтті.
– Қазіргі заманда түрлі әлеуметтік желілер мен бейресми ақпарат көздері арқылы радикалды идеология кең таралуда. Осыған байланысты азаматтарымыз діни ақпаратты тек ресми, мемлекеттік тіркеуден өткен дереккөздерден алуы тиіс, – деді Ұ.Құлтай.
Сондай-ақ, кездесу барысында ұлттық салт-дәстүр мен рухани құндылықтардың маңыздылығы жөнінде де сөз қозғалды. Қазақ халқының ғасырлар бойы қалыптасқан рухани мұрасы – жастарды тәрбиелеудің және қоғамда татулық орнатудың негізгі тетігі екені айтылды.
Кездесу соңында арнайы дайындалған ақпараттық үнпарақшалар тұрғындарға таратылып, қойылған сұрақтарға жауап берілді. Жергілікті тұрғындар өз тараптарынан мұндай кездесулердің маңызын атап өтіп, рухани тұрақтылықты сақтау бағытында алдағы уақытта да бірлесіп жұмыс жүргізуге дайын екендіктерін білдірді.
Айта кетейік, «Руханият» орталығының бұл бағыттағы жұмыстары Кентау қаласы мен ауылдық округтерде тұрақты түрде жүргізіліп келеді. Мақсат – ел ішіндегі тұрақтылықты сақтау, халықтың діни сауаттылығын арттыру және теріс идеологияға қарсы қоғамдық иммунитет қалыптастыру.
