Кентау қаласында діни экстремизм мен теріс идеологияның алдын алу бағытында жүйелі жұмыстар жүргізілуде. Осы орайда қалалық ішкі саясат бөлімінің «Кентау қалалық Руханият орталығы» КММ мамандары мемлекеттік қызмет алуға келген тұрғындармен ақпараттық-түсіндіру жұмысын ұйымдастырды.
Аталған іс-шараның мақсаты – азаматтардың діни сауаттылығын арттыру, деструктивті діни ағымдардың белгілері мен олардан сақтану жолдарын түсіндіру, қоғамда рухани тұрақтылықты сақтау. Орталық мамандары тұрғындарға дін атын жамылған жалған ағымдардың қоғамға тигізер зардабы жөнінде кеңінен ақпарат беріп, жастар арасында радикалды идеологияға бой алдырудың қауіптері туралы да тоқталды.
Сонымен қатар, қызмет алушыларға арнайы дайындалған «Жат ағымдардың жастарға әсері» және «Деструктивті діни ағымдардың портреттері» атты ақпараттық үнпарақшалар таратылып, олардың мазмұны бойынша түсіндірме жұмыстары жүргізілді.
Мұндай іс-шаралар тұрғындар көп шоғырланатын мемлекеттік мекемелерде тұрақты түрде өткізіліп келеді. Бұл – діни тұрақтылық пен қоғамдық қауіпсіздікті қамтамасыз етудегі маңызды қадам. Орталық мамандарының айтуынша, алдағы уақытта да профилактикалық жұмыстардың ауқымы кеңейіп, түрлі әлеуметтік топтармен тікелей байланыс жалғаса бермек.
