Мемлекет басшысының тапсырмасына сәйкес елімізде қоршаған ортаны қорғау мен экологиялық мәдениетті қалыптастыру бағытында кешенді іс-шаралар жүргізілуде. Осы орайда Түркістан облысында «Таза Қазақстан» республикалық акциясы аясында құқық қорғау органдары тарапынан да жүйелі жұмыстар атқарылуда.
Аталған акция мен «Заң және тәртіп» қағидатын іске асыру аясында Түркістан облысы полиция департаментінің қызметкерлері облыс аумағында санитарлық тазалық пен абаттандыру ережелерінің сақталуына бағытталған кең көлемді профилактикалық іс-шараларды жүзеге асырды.
Полицейлер жергілікті атқарушы органдармен бірлесіп, халық көп шоғырланатын қоғамдық орындар мен демалыс аймақтарында рейдтік бақылау ұйымдастырып, тұрғындарға экологиялық нормаларды сақтау, қоқысты арнайы орындарда ғана тастау қажеттігі жөнінде түсіндіру жұмыстарын жүргізді.
Нәтижесінде, акция аясында өңірде 17 мыңнан астам құқықбұзушылық фактісі анықталды. Оның ішінде 13 мыңнан астамы – жалпы пайдалануға арналған орындарды ластау болса, 4,3 мыңнан астамы – абаттандыру қағидаларын бұзу деректері.
Полиция қызметкерлері экологиялық тәртіпті сақтау — тек қоршаған ортаны қорғауға емес, сондай-ақ қоғамдағы құқықтық сананы арттыруға бағытталған маңызды міндет екенін атап өтуде. Бұл ретте «нөлдік төзімділік» қағидаты кез келген құқықбұзушылыққа бейжай қарамау қажеттігін көрсетеді.
Тәртіп сақшылары облыс тұрғындарын заң талаптарын қатаң сақтап, табиғатты аялауға, қоршаған ортаға ұқыпты қарауға шақырады. Қоғамдық тәртіп – баршамыздың ортақ жауапкершілігіміз екенін естен шығармаған жөн.



