Түркістан облысы, Қазығұрт ауданында Мемлекет басшысының «Таза Қазақстан» экологиялық бастамасын қолдау мақсатында ауқымды жалпы аудандық сенбілік ұйымдастырылды. Іс-шараға үш мыңнан астам тұрғын белсене қатысып, ауылдық округтердің барлығында тазалық жұмыстары қарқынды жүргізілді.
Сенбілікке мемлекеттік мекемелердің қызметкерлері, білім, денсаулық сақтау және мәдениет саласының өкілдерімен қатар ауыл тұрғындары мен жастар да жұмылды. Арнайы техникалардың көмегімен тұрмыстық қалдықтар белгіленген орындарға шығарылып, жалпы көлемі 30 тоннаға жуық қоқыс тазартылды. 50-ге жуық техника жұмысқа тартылды.
Тазалық шарасында арамшөптер шабылып, жасыл желектер суарылды, ағаштар әктеліп, гүлзарлар мен қоғамдық аумақтар ретке келтірілді. Бұл жұмыстар ауданның санитарлық жағдайын жақсартып қана қоймай, экологиялық мәдениетті арттыруға да сеп болды.
Аудан әкімі Азизхан Исмаилов сенбілік өткізіліп жатқан ауылдарды аралап, ұйымдастырылған жұмыстардың барысымен танысты. Ол жауапты сала басшыларына аудан аумағында тазалық мәдениетін күшейту, тұрғындарды белсенді түрде жұмылдыру және мұндай шараларды тұрақты түрде өткізуді тапсырды.
Экологиялық жауапкершілікті арттыруға бағытталған сенбілік Қазығұрт жұртшылығының бірлігін, туған жерге деген қамқорлығын тағы бір мәрте айқындады.



