Қазақстан Президенті Қасым-Жомарт Тоқаевтың Жолдауында медициналық инфрақұрылымды кешенді түрде жақсарту тапсырылған. Осы мақсатта Түркістан облысында ауқымды жұмыстар жүргізілуде. Сол бағытта Ордабасы ауданының Темірлан ауылында 200 орындық перинаталдық орталық құрылысы басталды. Шараға облыс әкімі Нұралхан Көшеров қатысып, нысанның уақыт капсуласын салды және құрылыс барысымен танысты.
– Бүгін Ордабасы жерінде жаңа медициналық нысанның құрылысын бастадық. Бұл орталық тек Ордабасы ғана емес, Бәйдібек, Сайрам, Түлкібас аудандары мен Арыс қаласының тұрғындарына қызмет көрсетеді. Енді олар облыс орталығына сабылмай, Темірланда заманауи ем қабылдай алады. Перинаталдық орталық жүкті әйелдер мен нәрестелерге жоғары сапалы медициналық көмек көрсетеді және демографияны жақсартуға зор үлес қосады, – деді Нұралхан Көшеров.
Жобаны мердігер – «ВД Строй-Инжиниринг» ЖШС жүзеге асырады. Перинаталдық орталық 200 орынға есептелген, ғимараттың жалпы алаңы 34 233,3 м², құрылыс ауданы 12 009,7 м². Құрылыс жүргізілетін жер телімінің аумағы – 8 гектар. Жаңа орталық облыстық деңгейде ана мен бала денсаулығын қорғауға, заманауи медициналық көмек көрсетуге бағытталған.
