Мемлекет басшысы Қасым-Жомарт Тоқаев өз Жолдауларында ауыл шаруашылығы мен шағын және орта бизнесті дамыту ел экономикасының негізгі тіректерінің бірі екенін атап өтіп келеді. Әсіресе, ауылдық жерлерде кәсіпкерлікті қолдау, мал шаруашылығын өркендету және қайта өңдеу саласын дамыту арқылы халықтың табысын арттыруға басымдық берілген.
Осы бағыттағы жұмыстар Кентау қаласында да жүйелі түрде жүзеге асырылуда. Қала әкімі Жандос Тасов Хантағы ауылына жасаған жұмыс сапары барысында жергілікті кәсіпкерлік нысандардың жағдайымен танысып, ауыл экономикасын дамытуға бағытталған жобалардың барысын бақылады.
Сапар барысында қала басшысы жергілікті кәсіпкер Жалғас Абдрамановтың мал шаруашылығымен айналысатын шаруашылығына барды. Қазіргі таңда кәсіпкер 50 бас жылқыны бордақылаумен айналысуда. Шаруашылықта малды күтіп-бағу, азықтандыру және ветеринарлық бақылау жұмыстары жүйелі жолға қойылған. Кәсіпкердің айтуынша, алдағы уақытта шаруашылық ауқымын кеңейту жоспарланып отыр. Атап айтқанда, қосымша 100 бас ірі қара бордақылау көзделген. Сонымен қатар, сиыр, бұқа және қой сатып алу арқылы мал басын көбейтіп, өндірістік әлеуетті арттыру жоспарланған.
Бұдан бөлек, кәсіпкер болашақта мал сою цехын ашуды да көздеп отыр. Бұл жоба іске асқан жағдайда ет өнімдерін өңдеу көлемі артып, дайын өнім нарыққа шығару мүмкіндігі кеңейеді. Сондай-ақ, ауылда жаңа жұмыс орындары ашылып, жергілікті тұрғындардың тұрақты табыс табуына жағдай жасалады. Қала әкімі мұндай кәсіпкерлік бастамалардың ауыл экономикасын дамытудағы маңызына тоқталып, жергілікті билік тарапынан әрдайым қолдау көрсетілетінін атап өтті. Оның айтуынша, шағын және орта бизнесті дамыту халықтың әл-ауқатын арттырудың негізгі жолдарының бірі.
Сонымен қатар, Кентау қаласы аумағында мал шаруашылығы саласы да тұрақты дамып келеді. Қазіргі таңда қалада мал саны 57 871 басты құрайды. Бұл көрсеткіш өңірде мал өсіру ісінің жүйелі жолға қойылғанын аңғартады. Қалаға қарасты елді мекендерде бүгінгі таңда 14 мал бордақылау алаңы жұмыс істеп тұр. Бұл нысандар жергілікті нарықты ет өнімдерімен қамтамасыз етуге және ауыл шаруашылығы саласының дамуына өз үлесін қосуда.
Жалпы айтқанда, Кентау қаласында мал шаруашылығы мен кәсіпкерлікті дамыту бағытындағы жұмыстар өңір экономикасын нығайтуға, жаңа жұмыс орындарын ашуға және тұрғындардың табысын арттыруға мүмкіндік беріп отыр.
