Мемлекет басшысы Қасым-Жомарт Тоқаев бастамашы болған экологиялық мәдениетті қалыптастыру және қоршаған ортаны қорғау бағытындағы «Таза Қазақстан» жалпыұлттық акциясы еліміздің барлық өңірлерінде кеңінен жүзеге асырылып келеді. Бұл бастама азаматтардың экологиялық жауапкершілігін арттыруға және елді мекендердің санитарлық жағдайын жақсартуға бағытталған.
Осыған орай Келес ауданында да ауқымды сенбілік ұйымдастырылып, оған аудан әкімі Жәнібек Ағыбаев арнайы қатысты. Тазалық шарасы аудан орталығынан бастап барлық ауылдық округтерді қамтып, бір мезетте жүргізілді.
Аудан басшысы сенбілік жұмыстарын Абай ауылындағы «Б.Ермеков» саябағынан бастады. Мұнда ол Ауған соғысы ардагерлеріне арналған аллеяны әктеу және сырлау жұмыстарына қатысып, қоғамдық кеңістікті абаттандыру ісіне үлес қосты. Кейін ол «Жеңіс» саябағында жалғасқан тазалық жұмыстарына қатысып, тұрғындармен бірге аумақты ретке келтіруге атсалысты.
Жалпы сенбілікке 2800-ге жуық адам жұмылдырылды. Олардың қатарында аудандық бөлім қызметкерлері, ауылдық округ әкімдіктерінің мамандары, кәсіпкерлер және жергілікті тұрғындар бар. Ұйымшылдықпен өткен шара барысында 70-тен астам ішкі көше тазаланып, 4 тоннаға жуық қоқыс шығарылды.
Тазалық акциясы тек аудан орталығында ғана емес, барлық ауылдық елді мекендерде қатар ұйымдастырылып, әрбір ауыл өз аумағын ретке келтіру және көркейту жұмыстарын жүргізді. Бұл бастама тұрғындардың экологиялық мәдениетін арттыруға және туған жерге деген жауапкершілік сезімін күшейтуге бағытталды.
Аудан әкімі Жәнібек Ағыбаев өз сөзінде тазалық әрбір азаматтың ортақ міндеті екенін атап өтіп, мұндай экологиялық шаралар алдағы уақытта да тұрақты түрде жалғасатынын жеткізді. Сонымен қатар, ол тұрғындарды қоршаған ортаны таза ұстауға және елді мекендердің көркеюіне белсенді қатысуға шақырды.
